الخميس، 04 أبريل 2019 - 04:28 م

احتفت صفحة «Egy 360» على موقع التواصل الاجتماعي «فيسبوك» بعيد ميلاد أبلة فضيلة.

ورصدت الصفحة مقتطفات من قصة حياة «أبلة فضيلة»، مضيفة: «النهاردة 4 إبريل عيد ميلاد أبلة فضيلة ربنا يديها الصحة وهنقول لك معلومات أول مرة تعرفها عنها».

وتابعت: «أبلة فضيلة من الناس اللى أتربت تربية صح.. وهى صغيرة إتريقت على شكل ولد صغير كان بيشتغل عندهم في البيت فقرر والدها يعاقبها إنها تأكل كل يوم مع الولد ده في المطبخ لمدة أسبوع وقال لها: (ده بيتعب وبيخدمك ماينفعش تقوليله حاجة زي كده)، ومن وقتها وهى مش بتعرف تشتم ولا تتريق على حد بتقول أبلة فضيلة: أنا أهلي ربوني كويس فبحب الناس كلها تكون متربية».

وأضافت: «لما أتخرجت سنة 1951 من كلية حقوق راحت اشتغلت في مكتب المحاماة بتاع حمدي باشا زكى اللى كان شغال وقتها وزير نقل؛ بس "فضيلة" كانت بتعمل حاجة كويسة ووحشة فى نفس الوقت إنها لما بييجى واحد يرفع قضية على حد كانت بتصلح ما بينهم قبل ما الموضوع يوصل للمحاكم، وطبعاً بعد أقل من 24 ساعة شغل في المكتب طردها حمدى باشا وقال لها: (إنتى ماتنفعيش فى المحاماة، تشتغلي في الإذاعة؟)، ويمكن ده كان من حظنا إحنا عشان من هنا كانت البداية وراحت اشتغلت في الإذاعة».

واضافت: «تخيل أول مرتب ليها كان كام؟ كان 12 جنيه، وكان كبير بالنسبة لها لدرجة غنها وزعت نصفه على الفقراء، وكمان كانت متجوزة المهندس إبراهيم أبو سريع كبير مهندسي الإذاعة، وعندها بنت واحدة بس هى ريم ومتجوزة وعايشة فى كندا».

بعد ما أشتهرت وبقى صوتها معروف وقبل ما تشترى عربية كانوا سواقين التاكسى لما يعرفوها من نبرة صوتها كانوا بيرفضوا ياخدوا منها أجرة بس هى كانت بتصمم وبتقول لهم خدوا الأجرة وهاتوا بيها حاجة حلوة لأولادكم.

فى برنامجها (غنوة وحدوتة) كل الرموز المصرية سواء سياسية أو فنية كانوا ضيوف معاها خلال حلقاتها!.. مفيش وزير ماطلعش معاها فى حلقة، ومن ثقتهم فى قيمة اللى بتقدمه كانت مجرد ما تطلب أى مسئول عشان يطلع ضيف معاها كان بيوافق فوراً، وبرضه مفيش فنان مطلعش معاها فى حلقة زى محمد عبد الوهاب وعبد الحليم حافظ وسيد مكاوى وكمال الشناوى وغيرهم حتى المثقفين زى نجيب محفوظ، وأنيس منصور أو العلماء زى د.فاروق الباز طلعوا معاها.

أبلة فضيلة أخدت وسام الإستحقاق من رئيس جمهورية مصر العربية بس قبلها كانت إتكرمت بوجودها فى قلب كل اللى سمعوا صوتها وبقت شريكة ليهم فى احلامهم وكانت سبب فى تكوين شخصياتهم.. كل سنة وإنتى طيبة وبخير يا أبلة فضيلة.