كامل الوزير
كامل الوزير


خلال اجتماعه مع لجنة الإدارة المحلية بمجلس النواب..

كامل الوزير: «ليا نظام في شغلي ومش بضحك على حد»

حسام صدقة

الأحد، 14 أبريل 2019 - 08:51 م

أكد كامل الوزير وزير النقل والمواصلات، أنه يحرص على تعظيم الموارد فى الوزارة بكل قطاعاتها للحفاظ على المال العام ومنع إهداره وضبط الأداء، مما يساعد على سرعة تنفيذ المشروعات وتحقيق الصالح العام.

جاء ذلك خلال اجتماع لجنة الإدارة المحلية بمجلس النواب برئاسة المهندس أحمد السجيني، مساء اليوم الأحد، بحضور وزير النقل، حيث يعد اليوم أول حضور للوزير في البرلمان منذ توليه منصبه.

وقال وزير النقل، موجها حديثه للنواب: "أشكركم على دعوتكم لي، وأعتذر عن دعوتكم لي المرة اللي فاتت وإني مجتش، لأن حصل لبس في عرض الخطاب الخاص بالحضور باجتماع اللجنة، وبمجرد ما عرفت إن الجلسة منعقدة بادرت واتصلت برئيس اللجنة، ومقدرتش أتأخر، أنا بمجرد ما أعرف إن حد عايز يقابلني يشوف شغلنا، بحب أروح للناس علشان يطمنوا على بلدهم وعلى الشغل وعلى جيشهم وقت ما كنت في القوات المسلحة، وبرحب إني أجي مجلس النواب ونتكلم ونعرف المشاكل ونحلها، وإن النواب تتواصلوا معايا ومش هسييبكم وهنطلع مع بعض كل يوم وننزل مع بعض الفجر ونشوف طرق وكباري وغيرها، وبخصوص ميناء البحر الأحمر، لو ثبتولى إن فعلا فيه قصور في الميناء، أنتوا جهزولى من دلوقتى أحسن واحد يمسك رئيس هيئة ميناء البحر الأحمر، أنتوا اللى حاسين بالناس وأنتوا اللي هتنقلولنا مطالبهم ومشاكلهم".

وتابع وزير النقل: "أنا حتى الآن مخدتش مليم من الدولة، والحمد لله بدأنا نعظم مواردنا، ونحاول نمنع التزويغ والهروب من التذاكر، وفى أسبوع جايبين إيراد أعلى من الأسبوع اللي قبله، فالإيرادات كانت حوالي 41,7 مليون الأسبوع اللي فات، بزيادة عن الأسبوع اللي قبله 8,4 مليون، واللي في إيدينا من موارد نعظمه ونستخدمه أحسن استخدام، لنلبى مطالبكم ومطالب الشعب الذين تمثلوه، فالسكة الحديد والموانى والنقل النهرى والكبارى كله فيه مشاكل وعدم انضباط، وأنا عندي اليوم 24 ساعة ملكوش عندي غير 24 ساعة، هنشتغل مع بعض 24 ساعة، ومن ستمتد أيده على المال العام مش هسيبه، وبعد اعتماد الموازنة هنبدأ نعظم المشروعات التي اعتمدت لينا، ونحاول أن نأخذ إمكانيات أكبر شوية من المتاح لوزارة النقل، لأنها تتابع مشروعات عديدة، ومؤشرات الموازنة بتقول إنه احتمال يعتمد لينا في وزارة النقل 35 مليار جنيه، لكن ميعملوش الشغل والمشروعات اللى تخلينى أقول إني خلال سنة عملت حاجة، فهناك طرق عديدة يتم العمل على تنفيذها، وهناك 10 محاور على النيل، كلهم شغالين فيهم في وقت واحد وليهم خطة، نخلص العشرة دول الأول ويدخلوا الخدمة والناس تستفيد بيهم".

واستطرد: "هناك تشريع نحاول نعده بخصوص الطرق، ولحد ما يعد هذا التشريع، أصدرت قرار وزاري لكل مديريات الطرق، نحاول نساعد المحافظات في الطرق الداخلية، ونختار الطرق المؤثرة التي تتكامل مع بعضها من حيث جودة الطرق والتكلفة المالية، هنساعد المحافظين، وكلهم مرحبين وشايفين إن دي خطوة لابد تتعمل، وفى وقت قريب هقولكم تعالوا الخطة بتاعتنا أهى، دا نظام شغلى مش بحب أضحك على حد، اللى هقدر اعمله هعمله، عايزين نتكلم عن طريق يخدم الناس، محدش يجى يقولى عايز اعمل 100 متر أدام بيتي، بنتكلم عن طرق داخلية وطرق رئيسية بين المحافظات، ونستهدف إننا نسهل على المواطن".

وعن الوضع في السكة الحديد، قال وزير النقل: "السكة الحديد فيها شغل كتير جدا، الخردة مثلا كانت تباع في أحسن سنة بـ12 مليون جنيه، خردة قضبان عربيات نقل وغيرها، وناس تعمل حركات مش مضبوطة، 12 مليون في الكهن الثمينة، إحنا قولنا الكلام دا مينفعش، وفى جلسة واحدة بيعت بـ340 مليون جنيه، وعايز أقولكم اطمنوا وأدونا فرصة وهتشوفوا نتيجة مجهود كبير وتوفير كبير في الفلوس وتعظيم في الموارد المتاحة، هنعمل اللي يرضى ربنا ويرضيكم ويرضى شعبنا العظيم، وأنا من قرية في مركز المنصورة بمحافظة الدقهلية".

واستمع وزير النقل الفريق كامل الوزير، خلال الاجتماع إلى النواب فيما يتعلق بمشاكل محافظاتهم ودوائرهم، وأغلبها متعلقة بمشكلات الطرق والمزلقانات والكباري.
 


الكلمات الدالة

 

 

 
 
 
 
 
 
 

مشاركة