الأربعاء، 02 أكتوبر 2019 - 05:33 م

تصدر «مصطفى أبو تورتة» تريند مواقع التواصل الاجتماعي، لم يكتفي رواد مواقع التواصل بكتابة التدوينات الكلامية فقط بل استعانوا بكوميكس لعدد من نجوم الفن.

«بوابة أخبار اليوم» ترصد لكم في هذا التقرير أبرز النجوم الذين تفاعلوا مع الهاشتاج. 

النجم محمد هنيدى علٌق بطريقة ساخرة على الموضوع، وكتب عبر حسابه على تويتر، قائلا: "‏والله كان فيه تورته هموت عليها"، وأخذ "القلشة" من فيلمه عندليب الدقى حينما قال: "كان فى زيتونة هموت عليها".

أما الفنان عمرو عبدالجليل، سخر من واقعة "مصطفي أبو تورتة"، وكتب عبر حسابه على موقع "إنستجرام"، قائلا: "‏حلوة التورتة دي وريني".

الواقعة تعود إلي فتاة كانت خطيبة هذا الشاب قامت بفضحه عبر مواقع التواصل الإجتماعي، تدعى نهال، عبر موقع التواصل الاجتماعي "فيسبوك"، صورة تجمعها بخطيبها وعلقت عليها قائلة: مش من العادي بتكلم في حياتي الشخصية على الفيسبوك، بس كان لازم أحكي عشان ماتعبش".

وتابعت: أنا اتقرا فاتحتي وخطوبتي كانت السبت اللي فات، وكان بيننا مشاكل زي أي اتنين، بس ماكنتش أتخيل إن ده ممكن يخليه بسيبني يوم الخطوبة في القاعة لوحدي، اتفاجئت إنه مش عازم صحابه ولا قرايبه كلهم وحسيت في حاجة غلط حتى مامته وأخته مفيش واحدة فيهم جت بركتلي وقولت أمشي اليوم، كل ما أقوله فين الشبكه اللي هنلبسها يقولي أصل اتكب عليها شربات أصل وقع جاتوه عليها.. طب خليها بعد البوفية وكلام كله غريب كدا لحد ما دخلنا بعد البوفية لقيت أهله كلهم مشيوا.. وقال أيه خالوا تعب! في يقوم أهله كلهم يمشوا وأنا في القاعة لوحدي بدور عليه الاقيه بيصرخ برا ويقول خالي عيان وبيطلم وحاجات غريبة كدا وأنا اقسم بالله ما مستوعبة اللي بيحصل هو في واحد خاله عيان عيلته كلها بتمشي الستات اختفوا بس كانو بيهزروا فوق نسوا العيان".

واختتمت حديثها "الأنيل إننا اكتشفنا إنهم أخدوا التورت معاهم طب مش خالك عيان، أخدتوا التورت معاكم ملبسنيش شبكة، و قبل كل دا بأيام جالي البيت وأخد التوينز بتاعت قراية الفاتحة بحجة إنه عايز يلبسني كله مرة واحدة في القاعة وأنا هبلة وافقت! مجاش في بالي للحظة واحدة انه هيعمل فيا كدا"، دلوقتى حبه أقول كل دا عشان ايه؟ كان ممكن ننهي بالمعروف من غير أذى نفسي ليا.. كان ممكن تسترجل وتيجي تقولي يلا نفركش وكنت لغيت الخطوبة.. مش جي وبترقص وتقولي محضرلك مفاجأة.. وفي نيتك تعمل فيا كدا.. حسبي الله ونعم الوكيل".