الخميس، 07 نوفمبر 2019 - 03:05 م

نعى الفنان عمرو سعد، الفنان الشاب هيثم أحمد زكي، الذي رحل فجر اليوم الخميس، إثر هبوط حاد في الدورة الدموية، في منزله، عن عمر ناهز الـ35 عاما.

وكتب عمرو سعد، عبر صفحته الشخصية بموقع التواصل الاجتماعي "فيسبوك" قائلا: "إحساس صعب ومؤلم وصادم بيخليني اقف فجأة وكأن الحياة بتجبرنا ساعات نتأمل ونبص علي كل اللي فات وساعتها تدخل الاحاسيس في بعضها كأن العربية فرملت فجأة وبعدها هدوء تام..، فعلا حزنت وهربت دموع من جوايا كأنها كانت مكتوبة باسمك وكأنك اخويا وكأني مسؤل عنك..، وكأن إحساسك بالوحدة واليتم جوايا..، وفضل الإحساس ده يهاجمني من وقت للتاني مش عارف ليه وكان بيدفعني اطمن عليك او احاول ادعمك علي قد ما اقدر..، ومش هانسي لما قولتلي انك بتحس اني اخوك..، في ناس ممكن تقصر في حق الكلمة والوعد وتستمر الحياة الصعبة اللي بتزداد توحش وصراعات وأنانية نست الإنسان حاجات كتير قوي وتاهت فيها المسميات وبقت معانيها مزيفة لان غاب عنها الإحساس..، علشان كده يا هيثم انت ما كنتش انت بس اللي وحيد..،والنهاردة انتهت وحدتك يا حبيبي ويتمك وضعفك".

وتابع عمرو: "النهاردة انت هاتكون في حضن أغلي واعز الناس أمك وأبوك..، النهاردة انت في أمان الله وفي رحمة الرحمن..، النهاردة البداية مش النهاية طريق سفرك كان قصير وصعب خلي الحبايب تشبع من حضنك وانعم بنعمة الحب الصادق والقرب من الرحمن الرحيم واحنا ما حليتناش حاجة غير شوية حزن وجرح جديد والدعاء ليك وانا بادعيلك بكل صدق بالرحمة والخير وان كان الطريق طويل او قصير في يوم هنتلاقي.. سلام".