الإثنين، 18 نوفمبر 2019 - 06:25 م

اقتربت الأغنية الجديدة للمطرب حكيم «سيبونا في حالنا» من ألبومه الجديد، من 200 ألف مشاهدة، بعد يومين من طرحها على موقع الفيديوهات الشهير «يوتيوب».

«سيبونا في حالنا».. من كلمات عصام حجاج وألحان تامر حجاج وتوزيع إسلام شيبسى وميدو مزيكا، ويدور أحداث كليب الأغنية عن الحسد .

وانتهى حكيم من تسجيل أغانى ألبومه الجديد المقرر طرحها خلال الفترة المقبلة، ويتعاون من خلاله مع عدد كبير من الشعراء والموزعين والملحنين، من ضمنهم عبده سليم، و شريف حمدان، و محيى حوار، و باسم منير، وأشرف البرنس، ومصطفي حسن، ومحمد عبد المنعم، وعصام شعبان.

 وتقول كلمات أغنية «سيبونا في حالنا»..

مركزين في حياتنا أكتر مننا، مستكترين علينا نعمة ربنا
عينهم مابتسيبناش .. ولا لسانهم رحمنا
معرفش ليه .. ليه كارهين راحتنا وفرحنا

سيبونا في حالنا .. سيبونا في حالنا،
عينكم جابت أجلنا
الرحمة حلوة .. وكفاية اللي جرالنا

شكرا على حسن المتابعة، وعلى الخداع وعلى الملاوعة
لحد كدا متشكرين
شكرا اوي على الاهتمام .. عنيكم خلصت الكلام
ممكن بقى نفصل يومين

سيبونا في حالنا .. سيبونا في حالنا، 
عينكم جابت أجلنا
الرحمة حلوة .. وكفاية اللي جرالنا

طول ما انت ماشي في دنيتك .. هتلاقي خلق في سكتك
سواد قلوبهم مش طبيعي .. مستخسرين فيك ضحكتك
كتلة أذى متشكلة في هيئة بشر
ناس كارهة غيرها وكارهة حتى نفسها
ناس غاوية نبر وعينها دي تفلق حجر
لو شافوا نعمة علينا بيبان غلها

سيبونا في حالنا .. سيبونا في حالنا
عينكم جابت أجلنا
الرحمة حلوة .. وكفاية اللي جرالنا
شكرا على حسن المتابعة
وعلى الخداع وعلى الملاوعة
لحد كدا متشكرين
شكرا اوي على الاهتمام .. عنيكم خلصت الكلام
ممكن بقى نفصل يومين