الإثنين، 02 ديسمبر 2019 - 07:45 م

يظل فيلم الزوجة الثانية علامة من علامات السينما المصرية ويظل صالحا لكل زمان ومكان ومناسبة.. ومع مهازل حملة أحد تيارات الإسلام السياسى لدعم المرأة كما يدعون تخيلت هذا الحوار بين بطلى الفيلم العمدة عتمان الذى قام بدوره العبقرى الراحل صلاح منصور والقديرة الراحلة سناء جميل التى قامت بدور زوجته الأولى حفيظة.
حفيظة: يا راجل فز قوم انت هتقضى طول عمرك نايم
عتمان: يا فتاح يا عليم يا رزاق كريم قولتى لى نام هنا ومتروحش عند فاطنة قلت ماشى انما تقلقى نومى لأ.
حفيظة: يا راجل قوم اعملك حركة كده.. رجالة اهم صورهم مليا الدنيا دقونهم لحد بطونهم لابسين مرايل المطبخ واللى منهم بيخرط الملوخية واللى بيقشر بطاطس واللى بيغسل المواعين.. قوم كده اعمل أى حاجة حتى تقمع البامية.
عتمان: شوفى بامية وملوخية ومواعين مليش فيها أنا شقيان ورا العمال فى الأرض ومهلوك.
حفيظة: أيوه اتحجج انت اللى هلكاك فاطنة مش العمال اسفخس عليك راجل طفس.
عتمان: ههههه الله يحظك يا حفيظة طول عمرك نكد بس ساعات كده بتقولى نكتة.
حفيظة: نكتة مش الناس دى بتقول قال الله وقال الرسول قوم اعمل زيهم
عتمان: يا وليه فى حاجات تعملها الحريم وحاجات يعملوها الرجالة ثم فرضا إذا الراجل ساعد مراته لظروف يفضح نفسه ويروح ينشر تصاوير والله ده حرام وميصحش.
حفيظة: يعنى انت مش مع دعم المرأة.. الدنيا كلتها بتقول دعم المرأة انت دايما كده مخاوز.
عتمان: أنا لا مخاوز ولا يحزنون أنا بقول الكلام الصح الراجل لازم يبقى راجل والست تفضل ست
حفيظة: دا كان زمان يا عمدة اتقطع ندره الوقتى الراجل بيطول شعره وبيلبس بنطلون مقطوع وبيرقص ولا أجدعها صافيناز
عتمان: وعرفتى كل ده منين يا حفيظة
حفيظة: من الفضائيات يا فالح اللى بقت زى الهم على القلب والفيس مهو الواد ابن فاطنة عمل لى حساب قال إيه وسماه «حالة تعب» اسم حلو ما أنا طول عمرى تعبانة منك بريه منك بريه.. قوم فز اغسلك صحنين وقمع البامية
عتمان: طب خليها بعدين بكره ولا بعده فى يوم فى شهر فى سنة زى ما بيقول حليم
حفيظة: انت هتغنى يا راجل فز قوم اعمل اللى قولتلك عليه
عتمان: يا حفيظة الليالى جيه.. هى حبكت.. شوفى بأه أنا مش فاضيلك أنا عندى جمع محصول وتقديم تظلم نرجع بطاقة التموين وأروح المدرسة أشوف الواد اللى بيتنمروا بيه ده.. قلتى ايه أغسل الصحون ولا أروح أقضى مصالحى
حفيظة: والله وغلبتنى يا عتمان روح اعمل مصالحك بس مش معديهالك هتغسل الصحون وهتخرط الملوخية النهاردة ولا بكره
عتمان: أمرنا الله عارفة يا حفيظة مشكلتنا ايه ان الراجل مبقاش راجل والست مبقتش ست كله قلب على كله.. الناس اللى بيعملوا كده ناس فاضية بدل ميجددوا الخطاب الدينى زى الريس مقال قال إيه بيخرطوا الملوخية
حفيظة: طب يا خوى قول فى سرك لا يقولوا عليك عدو المرأة
 عتمان: المرأة هى فين المرأة
 حفيظة: كده طب وهو فين الراجل