الإثنين، 06 يناير 2020 - 09:49 م

طالب الرئيس عبد الفتاح السيسي، الشعب المصري بعدم القلق من الأحداث الجارية في المنطقة، مؤكدًا أنه بوحدة المصريين لن يستطيع أحد الإضرار بمصر أو المصريين.

وأكد الرئيس ، في كلمته خلال زيارته للكاتدرائية بالعاصمة الإدارية، لتهنئة الأخوة الأقباط بعيد الميلاد المجيد، أن مصر تتعامل بشرف في زمن ليس به الشرف، ولا يمكن أن ينصر الله سوى الأشراف والمخلصين والأمناء والمحبين لبعضهم البعض.

وقال الرئيس السيسي: "لا تقلقوا ولا يوجد مجال للقلق طالما كان المصريون يد واحدة، وربنا أراد إننا نكون في ظروف صعبة وعلينا أننا نلاحظ أن حالنا كان ممكن يبقى كده.. محدش يقدر يعمل فينا حاجة أو يجرنا هنا أو هناك.. إحنا قادرين بفضل الله سبحانه وتعالى.. وبفضل دعواتكم ربنا يلهمنا الصدق والبصيرة، ونبقى شايفين الإجراء الأفضل اللي ممكن نعمله.. وطول ما الشعب المصري يد واحدة محدش يقدر بعمل معانا حاجة".

ووجه الرئيس السيسي التهنئة للأخوة الأقباط، قائلا: "كل سنة وأنتم طيبين واسمحوا لي أني أقول استقبالكم جميل ورائع وأننا نحب بعضنا أمر جميل وزي ما اتعودنا في بداية كل سنة نيجي نحتفل معاكم ونهنئكم ونقول عيد ميلاد مجيد وسنة سعيدة علينا كلنا".

وطالب الرئيس المصريين بالانتباه لمحاولات الفتن والوقيعة، مؤكدا أن مصر وطن لكل المصريين ولا يوجد تفرقة بين مصري وآخر.

وقال الرئيس: "لازم دايما نخلي بالنا من علاقتنا ببعضنا البعض.. إذا كنتم بتحبوا ربنا حبوا بعضكم وماتخلوش حد أبدًا يدخل بينا ويحاول يوقع بينا ويحاول بعمل فتنة.. البلد دي بلدنا كلنا.. ولازم دايما مع بعض وكل واحد يبقى عارف إنه زيه زي أخوه مفيش حد له زيادة أو نقص، وأي محاولة للفتن أو الوقيعة ننتبه لها ويبقى مخنا وقلبنا أكبر منها".