الأحد، 16 فبراير 2020 - 12:18 م

وجه المطرب رامي جمال رسالة مؤثرة لجمهوره بعد طرح ألبومه الجديد الذي يحمل عنوان "أنا لوحدي".

وقال رامي جمال عبر حسابه الشخصي بموقع التواصل الاجتماعي "تويتر": "البوست ده طويل شوية معلش.. أولا شكرا على حاجة حصلت ولسة هتحصل شكرا لكل شخص دعمني نفسيا الفترة اللي فاتت.. شكرا لكل فنان من اللي شاركوني صناعة ألبومي الأخير نفسي أشكركم بالاسم بس انتم عارفين نفسكم.. أنا وانتم ركزنا وتعبنا وحبينا اللي بنعمله وحبينا بعض وده باين للناس شايفكم بتشيروا أغاني بعض ودي حاجة مبيعملهاش غير الناس السليمة اللي قلبها أبيض وأنا رأيي من زمان النية الجميلة أهم سبب للنجاح".

وأضاف: "انتو السبب بعد ربنا فى كل كلمة حلوة بسمعها ويارب ديما في ضهر بعض.. عاوز أشكر  كل فنان ومطرب ومذيع ومصور صورلنا في سقف.. قبولكم للفكرة ووجودكم هو السبب في نجاحها وهى دي روح الفن والروح الحلوة اللي بجد.. أنا ربنا خلاني أشوف نعم كتير حلوة الفترة اللى فاتت الحمدلله.. عاوز أشكر نجوم ريكورد اللي بتنتجلي من 2012 لحد النهاردة شكرا على إيمانكم بموهبتي وعلى المجهود اللي عملته معايا عارف أن دي أصعب فترة للإنتاج في مصر وأصعب فترة في الفن عموما صدقتوني وساعدتوني أعمل كل اللي عايزه.. شكرا لعيلتي الصغيرة وعيلتي الكبيرة اللي شغالة في ضهري والتيم بتاعي كله.. شكرا لزوجتي اللى بتشوفنى صدفة وشكرا لأخواتي وأبويا وأمى اللي رضاهم سبب كبير في النعمة دي".

واختتم رامي جمال رسالته: "شكرا للجمهور المحترم اللى بيدعم الفن المحترم.. شكرا لوقوفكي في ضهرى والله بس تعليقاتكم بقيت حاسس انى محمي ومعايا عزوة وبقيت عارف أن لما ربنا بيأذن بيسخر كل حاجة للصالح يعنى حتى الابتلاء خلاني أشوف حب ربنا يديمه.. أتمنى يكون تعبنا عجبكم في وقت كل الفنانين محتارين من انتشار أذواق جديدة وأنا عارف أنكم أذوق جمهور والحلو هيعلى بيكم وهيكمل.. يارب يكون الألبوم قد توقعتكم وبجد بحبكم جدا جدا جدا". 

رامي جمال تعاون في ألبومه الجديد "أنا لوحدي" مع الشعراء تامر حسين، ومحمد عاطف، وجمال الخولى، وأحمد المالكى، وشادى نور، وأحمد عرفان، ورقية عبد العزيز، ومصطفى حسن، ومحمد أبو نعمة، أما المحلنين فهم، بلال سرور، ومحمد أنيس، وياسر نور، ومدين، بينما التوزيع الموسيقي فكان لكل من توما، ونادر حمدي، وشريف مكاوى، وأحمد إبراهيم، وأحمد المغربى، ووسام عبد المنعم، وكريم عبد الوهاب، وشارك رامى جمال فى الألبوم كملحن حيث قدم ما يقرب من 9  أغنيات.

عاوز اعرف رأيكم في الالبوم 🙏 pic.twitter.com/ZlHQoiAzfj

— Ramy Gamal (@RamyGamal) February 15, 2020