سارة الذهبى سارة الذهبى

يوميات الأخبار

نكد الستات يكسب واللا نكد الرجالة؟

بوابة أخبار اليوم السبت، 22 فبراير 2020 - 06:50 م

لأ حضرتك ده متأثر شويتين بفيلم دعاء الكروان عشان لسه شايفينه امبارح وكان فاكر نفسه هنادى!!

 معروف عن الستات منذ بدء الخليفة انها كائنات تتغذى على النكد مع إن ده ظلم وافترا على الآخر.. عارفين ليه؟ مش عشان بنفى عننا تهمة النكد... أبداً.. هبقى كذابة!
الفكرة كلها ان الرجالة طلعوا بيعِزّوا النكد هما كمان، بل ويتلذذوا فى دور الغموض اللى بيعيشوه طول ما هما متضايقين! الست مننا راحت واللا جت غلبانة.. ديّتها تسألها ٥٠٠ مرة «مالك؟» وهتقولك «مفيش» فلما حضرتك هتزهق وتقولها «طب براحتك» هتعيط وتلمّ عليك خلق الله عشان كانت مقررة ترد عليك فى المرة ٥٠١ بس انت اللى خُلقك ضيق ونَفَسك قصير!!
وان جيت للحق احنا بنقول «مفيش» لإن ده الرد اللى وجدنا عليه أمهاتنا من أيام الفراعنة على الأغلب.. تقريباً دى لعنة وطالتنا كلنا.. احنا بنقول «مفيش» لإننا بنسبة ٩٠٪ مش عارفين ايه اللى مضايقنا بالظبط وغالباً أخرت المتمّة المشكلة كلها هتلبس فى وش حضرتك عشان سبتها زعلانة ومقعدتش تحايلها ٣ سنين!! طب والله احنا غلابة!
لكن زعل الرجالة بقى يا حفييييظ!!!
الراجل منكم يدخل جوه الكهف وما يتعتعش قيمة شهرين تلاتة وولا حد فى البيت فاهمله هو زعلان من مراته واللا مديره واللا قرفان من حماته واللا الأهلى خسر ماتش واللا صلاح مكانش فى الفورمة!! تقعدى تهاتى مع نفسك وتكتشفى ان جوزك لابس وش جبس من أول ما يدخل من البيت لحد ما يخرج تانى يوم!!
دابب وشه فى الموبايل ومش بيرد على ولا كلمة!! تقوليله مالك.. يقولك سيبينى فى حالي... بطلى زن.. تسيبيه... يقوم شاخط فى البيت بصوت أجش كإنه بالع عيل صغير ويقعد يبرطم رايح جاى ان مفيش حد سائل فيه وان مراته أهم حاجة عندها العيال وهو يولع، مع ان الست دى لسانها نشف تسأله مالك ويقولها انزلى من على ودانى!!
نكد الراجل بينتهى فجأة.. يعنى الصبح كان نازل شايط ورجع من الشغل بيهزر ولا كإنه منكّد على البيت بقاله شهر وقال ايه مستنى من مراته لما يُنكشها ويهزر معاها تنسى عُزلته فى الكهف اللى قعدت اسبوعين من غير ما تفهم ماله وتضحك عادى متغاضية عن دقنه الطويلة اللى وصلت لركبته وشعره اللى ما اتحلقش كإنه كان فى مَنفى!! الستات مش بتفك كده خالص.. حضرتك غلبان أوى...
فى دلوقتى حرب مُمنهجة وخناقة محترمة مستنياك عشان مش وقت ما تفُك؛ فا المدام هتفُك.. هى مش فرخة حضرتك مطلعها من الفريزر!! دى انسانة عندها مشاعر وأحاسيس وهرمونات بتتلكك على الحزن والنكد... لو الستات بوزها شبرين فالرجالة لما بتقلب بوزها بيبقى فى حالة حظر تجوال فى البيت.. العيال بتتكلم بالإشارة... والأسرة كلها واخدالها ساتر لإنهم مش فاهمين هما عدو ولا حبيب... هيتغدر بيهم امتى... هما سبب البوز واللّا مجرد ضحية..!
الست بطبيعتها هبلة وبتتصالح لو قولتيلها «خسيتي... احلويتي.. انتى فيكى ايه متغير النهارده عن كل يوم؟» لكن الراجل لما بيقلب أجارك الله... بتلاقيه عامل عليكى كمّاشة ولا أجدعها وكيل نيابة وهاريكى اسئلة من نوع بم تفسر وعلل.. نكد الستات فطرى وطبيعى.. بس ربنا ما يوريكوا تكشيرة راجل متنكد وقرر ينكّد على البيت كله.
 فشر العيال ملوش مثال
 صباح الخير.. مدام نورا معايا؟
= ايوه يا افندم.. مين؟
- انا الأخصائية الاجتماعية فى مدرسة آدم.
= آدم كويس؟؟
- آه يا مدام متقلقيش.. كنت عايزه أستفسر منك بس على شوية حاجات.
= خير؟
- حضرتك ازاى تحرميه من الأكل والشرب وهو فى سن نمو كده؟! ده طفل!! ما بتخافوش ربنا طيب؟
= احرمه؟! ازاى يعني! ده نص مرتب جوزى ضايع على اكل آدم لوحده.
- ابن حضرتك مصمم ياخد سندوتشات صحابه واللى بيرفض بيعضه فى راسه وبيقول عُمر ماما ما حمّرتلى بطاطس فى البيت وقعد يتشحتف عشان نفسه يدوق طعمها ولو مرة قبل ما يموت! ده شاف سندوتش جبنة رومى مع واحد قعد يحضن السندوتش ويشمشم فيه زى الفيران!!
= والله لسه محمراله امبارح كيلو واكله لوحده والنهارده باعته معاه سندوتش رومى ولانشون فى اللانش بوكس، حتى شوفيه بنفسك.
- لانش بوكس؟ ده قالنا انك بتلفيله السندوتشات فى جرايد مبلولة كان ملفوف فيها خيار والحبر بيطفح فيها على السندوتشات!! وكان هينط من الشباك عشان تجيبوله لانش بوكس فتحتوا له الشباك عادى!!
= طب بالذمة ده كلام يتعقل؟
- وياريت حضرتك تبقى تزوديله مصروف لإنه بيقول ان مرتب باباه ٧٠ الف فى الشهر ورغم كده بتدوله مصروف ٣٥ قرش!!
- لأ وحياتك احنا بنديله ربع جنيه مخروم وباباه بيقبض نص مليون فى الشهر واللا اقولك بيتحاسب بالاسبوع زى محمد صلاح!! ما هو جنان بجنان بقى.
- ده حتى بيقول انكو سافرتوا ديزنى لاند فى الصيف ونسيتوه فى المطار ومحدش فكّر يسأل فيه لحد ما ركب اوبر وروَّح لوحده...
= هو ده كان الجزء الاول واللا التانى من Home alone يا بت يا نورا الاول واللا التاني؟! اه التاني.. طيب طلب أوبر ازاى حبيب ماما اللى معهوش موبايل؟!
- آه صحيح ما هو بيقول اخوه معاه آيفون ١٠ وهو معاهوش موبايل.
= أخوه مين سعادتك؟!! هو معندوش الا ليان أخته!! ده واكل بعقلكو حلاوة والله.
- طيب هل انتى او باباه بتعلقوه فى النجفة طول الليل أو بتضربوه بإيد الهون او أكّلتوه انبوبة معجون سنان كرست الخضرا من اللى بتعمل واوا فى البؤ عشان محطش شرابه فى الغسالة امبارح او حطيتوله برى القلم الرصاص وحشرتهوله فى ودنه امبارح وقولتوله لو مبطلتش زن هنشيل شعر مناخيرك بالملقاط واحدة واحدة؟!
= لأ طبعا الكلام ده محصلش.
- طيب هل بتجيبوا لأخته لعب بالعبيط وبتطوحوله لعبه من الدور التاسع وباباه بينزل يمشى عليهم بكاوتشات العربية عشان يحسّره عليهم او بترشوا عليهم مياه نار عشان لعبه تتشوه لإنكو بتحبوا اخته اكتر منه؟!!
= هو قالكم كده؟!
- آه يا افندم وبيقول ان اخر مرة جبتوله لعبة كانت من على الرصيف من ٨ سنين وخلتوه يشحتها من الراجل عشان هو لقيط ملوش أب وأم..
= لقيط؟!! حاسة ان عبد الحليم حافظ قدامى يا ربي! الكلمة دى مش وسعت منه شوية؟! بس هو عنده ٥ ونص أصلا!! ده بيُفشر عليكو والله.
- طيب هل بتفرشوله على عتبة باب الشقة عشان ينام ولازم يسيأ السلالم كلها يا اما بتنيموه على البلاط من غير فرش او بتنزلوه تحت عند البواب؟
= طيب بذمتك ودينك انتى تصدقى الهبل اللى بيتقال ده؟!
- طيب هو بيقول انكو هددتوه انو هيروح فى الوبا لو مغسلش المواعين.
= لأ حضرتك ده متأثر شويتين بفيلم دعاء الكروان عشان لسه شايفينه امبارح وكان فاكر نفسه هنادي!! ما تركزيش معاه.
- تمام.. عامة احنا بس كنا حابين نتطمن لإن الولد كان مصمم يلجأ للقانون عشان ياخد مجراه بس احنا قولناله يستنى نكلمكو الاول.
- لا متقلقيش... ابعتيهولى بس على البيت وانا هعرفه آخرت الفشر ده ايه.. ما تقلقيش خالص.. النهارده هيعرف يعنى ايه «هيروح فى الوبا»..
شكرا لذوقك..
 الجيل أبو معلقة دهب!
بحمد ربنا كل يوم انى مكنتش طفلة فى الجيل ده!! مع انى كل يوم بخاف على ولادى اكتر واكتر!
جيل اتولد وفى بؤه معلقة دهب وبرضه مش عاجب!
مولودين بطبع مهبب اسمه التمرد! واللى ساهم فى زيادة الطبع ده أهاليهم نفسهم والناس اللى حواليهم! دلوقتى فى ناس كتير مُحرّكها الأساسى فى الحياة «المنظرة»... بيشتغلوا ليل نهار عشان يلبسوا براندات ويتفشخروا بيها هما وعيالهم مش عشان حاجة تاني.. مش بيشوفوا عيالهم عشان واخدين ساعات أوڤر تايم عشان ولادهم يدخلوا مدرسة كذا الدولية... مش ايماناً منهم بأهمية التعليم ولكن حباً فى التباهى بإن ولادهم فى المدرسة الفُلانية ويتفشخروا على دى وده! الناس دى بتربى عيال مش مقدّرين قيمة القرش عشان كل طلباتهم مُجابة حتى لو أهلهم هيستلفوا!
ومعلّقين ده على شماعة التربية الإيجابية مع إن دى ملهاش أى علاقة بالتربية!! مهما تجبلهم لعب مش عاجب..
مهما تخرجهم مش عاجب..
مهما تضحى عشانهم فا مش بيقدّروا لإنهم اتربوا تربية فيها خلل.. فيها دلع.. استهتار.. عدم تقدير.. محدش يلوم على الجيل اللى طالع بلا شعور عشان الأهالى اللى بتربّى هى السبب!!
 ما تعاتبش اللى اتغير.. عاتب اللى غيّره!!
 مفيش حد بيتغير ١٨٠ درجة من فراغ! مفيش حد بينام ويصحى يبقى انطوائى او مش فارق معاه حد أو بلا أمل! المرحلة دى بيسبقها مراحل كتير عاشها الشخص ده لوحده ومحدش فكّر ياخد بإيده! ياما خاب ظنه فى ده.. وياما وقف جنب دول ولما احتاجهم لفّوله ضهرهم.. وياما اتعشم ولقى نفسه لوحده! ما تلوموش اللى تغيّر.. لوموا الناس اللى وصلته لكده.. لما شخص بيتجاوز مواقف صعبة فى حياته لوحده لازم يتعلم التخلّي.. لازم يألف الوحدة والانعزال.. عشان لو كان لقى اللى يبلّ ريقه حتى لو بكلمتين جبر خواطر مكانش ده بقى حاله!!


الاخبار المرتبطة

اظهر وبان «ملكش» أمان ! اظهر وبان «ملكش» أمان ! الأحد، 29 مارس 2020 07:07 م
كورونا يحكم العالم كورونا يحكم العالم الأربعاء، 25 مارس 2020 06:49 م

هوامش على دفتر «الكورونا» هوامش على دفتر «الكورونا» الثلاثاء، 24 مارس 2020 05:48 م
السيجارة والشيشة السيجارة والشيشة الإثنين، 23 مارس 2020 06:58 م
«الشوطة» فى زمن الكورونا «الشوطة» فى زمن الكورونا الخميس، 19 مارس 2020 06:53 م

الأكثر قراءة



 

 

الرجوع الى أعلى الصفحة