الأحد، 01 مارس 2020 - 05:08 م

أصيب طفل رضيع عمره شهرين بتشوه في قدمه نتيجة خطأ طبي أثناء علاجه من نزلة شعبية حادة ومن خلال هذا التقرير يعرض والد الطفل ما تعرض له ابنه.

في البداية يقول كريم السيد والد الطفل يونس إنه في تاريخ 24-2-2020 "ابني عمره شهرين تعب رحت بيه للدكتورة وطلبت أشعة عرفت منها إن في نزلة شعبية حادة وعليه طلبت حجز الولد في رعاية صحية لمتابعة الحالة من دكاترة وتمريض لتلقي العلاج والجلسات اللازمة".
توجهت بالولد لأحد المستشفيات الخاصة بمحطة الطالبية شارع الهرم وبعد دفع مبلغ مالي لحجز الولد طلعنا غرفة سيئة ودون المستوى بالنسبة لمستشفى خاصة.
بدأنا العلاج أدوية في الكانيولا وجلسات بخار على الصدر وأكسجين وخلافه تاني يوم اتغير مكان الكانيولا من طاقم التمريض من إيد الطفل لرجله، وتم إدخال العلاج من خلالها لكن بدون متابعة لحالة الكانيولا، بعد جرعة من جرعات العلاج الولد بدأ يبكي بكاء غير طبيعي وبكل الطرق مش بيسكت، سألت الممرض امتى ميعاد الدواء بحيث إن لو لسة بدري يشيلها ونركبها بعدين لكنه رفض وبعدها بكام ساعة واحنا بنحاول نهدي الولد لقيت إن الكانيولا خرجت من رجله طلبت الممرض يشيلها جه وشالها بردوا بدون متابعة، بعدها اكتشفت تورم وانتفاخ شديد في رجل الولد جريت عليهم كانوا بيبدلوا شيفت الممرض المسئول شافني وعادي كمل تغيير هدومه ومشي والطاقم الجديد بيقوللي احنا لسه جايين مغيرناش حتى، رجعت بالولد على الأوضة شيلت من رجله البلاستر وتحته تجمع دموي كل ده وهما مش مديين اهتمام بالعكس شايفينني متوتر وبتصرف بشكل مش طبيعي عشان قلقان على ابني، بعد الكشف من الدكتور المناوب قاللي دي هتروح بكمدات ودهان للكدمات بالكتير على نهاية اليوم بلغتهم إني مش هأعمل الكلام ده في المستشفى، لكن كملت معاهم شوية عشان أشوف بعيني اللي بيقولوه وراحت شوية لكن مش نهائي وصدقتهم وروحت بيتي بتاريخ ٢٦/٠٢/٢٠٢٠ لاستكمال باقي العلاج.

 لكن بعد يومين التجمع الدموي لسة زي ما هو بل بالعكس بدأ ينتفخ تاني رحت لدكتور جراحة وقالي عملية استئصال للجزء ده فوراً وحجزت الولد وعملتله العملية بتاريخ ٢٩/٠٢/٢٠٢٠ ويا تسيب علامة وتشوه في رجل الولد أو بعد شهر و نصف هنعمل عملية ترقيع للجزء المستأصل و بردو هتسيب علامة و تشوه.