الإثنين، 09 مارس 2020 - 02:21 م

رد الشاعر تامر حسين علي هجوم الفنان زكي فطين عبد الوهاب علي النجم عمرو دياب، بعد كتابته لتدوينة علي موقع فيس بوك.

وكتب فطين عبدالوهاب، عبر حسابه الرسمي بموقع فيسبوك: "أنا عارف إن فيه ناس هتزعل من الكلام اللي هقوله، لكن بعد الهجوم الشرس على أغاني وموسيقى المهرجانات.. نفسي أفهم عمرو دياب الملقب بالهضبة.. بمناسبة إيه".

وأضاف: "أغانيه وألحانه وكلمات أغانيه هي هي من 20 سنة، ده إفلاس فني ما بعده إفلاس، أغاني المهرجانات فيها تجديد وابتكار وتنوع أكتر بكتير غصب عن الملحن الفذ حلمي بكر".

ورد عليه تامر بتدوينة قال فيها "أحياناً يبقى عندك واحد صاحبك مُهندس يجيلك دور برد يكتبلك روشتة علاج وخُد ده وهات ده وده هيخليك زى الفُل بكرة من غير ما يفهم ان كل دوا م اللى بيقترحوا له أثار جانبية وتركيبات كميائية  وانه اساساً مش دكتور  والله مادكتور 😂ولا خريج طب ده الأستاذ خريج هندسة يعنى كل شُغله رسومات ومبانى و لا دخل مستشفى ولا عنده خبرة انه اساساً يدى حُقنة  بس ازاى مايقولشى رأيه !!.

وأضاف "اهو ده بالظبط الظاهرة المنُتشرة فى مجالنا الفنى وتحديداً مجال (الغُناء)من غير المتخصصين فى الصناعة والإستهتار والإستهوان بصناعة عناصرها شاعر وملحن وموزع ومُهندس صوت وناس خريجين معهد موسيقى وتربية موسيقية  وغيرهم من التخصُصات ومطرب ورؤية فنية ومراعاة ذوق عام للجمهور ومعادلة وحسبة مُعقدة".

وقال: نيجى بقى ل بوست الأستاذ قالك افلاس أخر( ٢٠ سنة يعنى حضرتك ابتداءً من  "تملى معاك"  مثلاً اللى غير شكل الأغنية وقربنا للعالمية والا حضرتك قصدك مثلاً "أكتر واحد بيحبك" اللى خد أورد  والا "انا عايش" الأشهر والأجرء موسيقياً فى مسيرة الفنان عمرو دياب والا "ليلى نهارى " اللى اترجم معظم اغانيه ل لُغات العالم ؟ طب ممكن يكون قصدك "وياه" اللى كان فى وياه أفضل اغنية فى افريقيا  مش بكلمك ع المهندسين فقط😂طب سيبك من البومات تانيه والا الليله اللى خد ٤ جوايز أورد والراجل رفض يروح يستلمها واكتفى ب فيديو وهو فى بلده والا ايه والا ايه والا ايه .

وأضاف: طب حضرتك ماشفتش نجاح "يتعلموا" فقط بما انى واحد من الصُناع ف ادافع عن نفسى مش هقولك البومات اخر ٢٠ سنة طب ماحدش قالك ان أخر البوم الراجل مغير ومواكب كل الأذواق والأجيال ومغير قاموس الكلمة يوم تلات ..قدام مرايتها... عم الطبيب... مهرجان ... و الخ ...

وقال: الحقيقة انا عندى إستياء  من مُجادلة (وجهل من لا يفقه) والاستخفاف والإستهتار بصناعة كاملة بشعراء وملحنين وموزعين ومهندسين صوت بمطرب ناجح بقاله ٣٥ 😀ارحمونا انت بتنصر المهرجانات من حيث الشكل الموسيقى، والتنوع مثلاً اللى هو فين،  احنا عندنا اكتر من نوع موسيقى نقدمه هاوس لاتين مقسوم وغيره ده لو ع المزيكا اما لو بتنصر  نوع الكلام و خمور وحشيش... وأمك صاحبتى ومطوتى وغيرهم من الالفاظ والمصطلحات اللى أخجل اكتبها ؟ دى حاجه تانيه بقى👏"