الجمعة، 15 مايو 2020 - 11:42 م

15 يوما قضاها الدكتور مجدي شهدي، ابن نجع حمادي، في مستشفى الحجر الصحي بالعجوزة لمعالجة مرضى فيروس كورونا المستجد.

وأشار الدكتور مجدي شهدي إلى أن الطبيب في مستشفى العزل بيقاتل عدو مش شايفه ولا عارف عنه حاجة" وأن المرض خطورته في سرعة انتشاره، وإنما وفياته قليلة جدا جدا.

وتابع: لا يوجد علاج أثبت فاعليته ١٠٠% إنما الحاجة المضمونة هي الوقاية وبعض أنواع الفيتامينات التي تقوي المناعة.

وأردف: على المستوى الشخصي «أنا مش شايف أنه الحظر الكامل هو الحل.. الحل هو مسافات بين الناس وأي بني آدم في الشارع لازم ينزل من بيته بماسك وتكون في غرامة للمخالف».

وتابع قائلا: عندما تكون مرتدي كمامة لازم تتأكد أن الذي أمامك أو الذي تتعامل معاه يرتدي أيضا الكمامة، "لأنك لو لوحدك لابس كدا نسبة إصابتك ٧٠% لو الشخص ده مصاب .

وأعطى شهدي تعليماته للحد من انتشار فيروس كورونا المستجد قائلا: غسيل الأيدي بالمياه والصابون لمدة ٢٠ ثانية أقوى بمراحل من الكحول، تنظيف الأسطح والأرضيات مطلوب بس خد بالك الفيروس بيموت لوحده  من على السطح المعرض للشمس بعد ٣ ساعات  أما الأسطح اللي مش معرضة للشمس الفيرس بيموت بعد ٦ ساعات وبناء عليه إهدار المال على تعقيم الشوارع والأسفلت.

الفيروس بينتقل عن طريق الرزاز (droplet) فقط ، يعنى لو واحد كح أو عطس أو تنفس في وشك، أما انتقاله عن طريق الأكل أو الهواء أو العلاقات الجنسية فده كله مش صح، مؤكدا الفيروس فترة حضانته من ٤ إلى ١٤ يوم "يعنى لا قدر الله أما تتعرض لإصابة  فالأعراض مش هتظهر عليك في الحال".

وتابع: عندما تحس بأعراض برد خفيفة أو سخونة خفيفة بلاش تتعب نفسك وتنزل من بيتك وتروح تكشف ..خليك في بيتك أحسن وخد أدوية البرد التي تحتوى على مادة بارسيتامول وبلاش تخالط حد في البيت ودة ضمان ليك واللي حواليك وهتخف إن شاء الله، ولكن لو اشتكيت بضيق نفس شديد وكحة أشد وسخونة مش بتنزل لا هنا لازم تروح لأقرب مستشفى حميات أو صدر.

وأوضح الفيروس في بدايته مش بيظهر لا في تحليل الدم ولا الإشاعات خصوصا لو الأعراض طفيفة بناء عليه الرجاء من الأطباء بلاش نستعجل الفحوصات والأشعة، طمن العيان وأوصف له العلاج المناسب ويقعد ف البيت فقط.

-مجموعة فيتامينات ( vitamin C , zinc and D )  كل  دول حاجات بتزود المناعة ووقاية لك من الإصابة.

واختتم حديثه قائلا: «آخر حاجة أنا بوجه رسالة شكر وعرفان وتقدير لكل فرد في الطاقم الطبي سواء أطباء.. تمربض.. فنيين .. عمال .. وخصوصا طاقم العزل الناس دى فعلا وبدون مبالغة في حالة حرب، تخيل حضرتك لو عرفت انه واحد جيرانك عنده كورونا أنت هتبقى محبوس ومرعوب  طب تخيل حضرتك انه إحنا شغالين ومتعايشين  وسط الحالات دى علي مدار اليوم دون تقصير والحمد لله"، كمان أحب اخص طاقم التمريض اللي أنا بعتبره حائط الصد الأول في هذه الحرب اللي دورهم لا يقل عن دور الأطباء بل بالعكس احتكاكهم بمريض كورونا أكثر من الأطباء نظرا لإعطاء العلاج وتركيب كانيولات ومحاليل ورسم القلب...الخ، نسأل الله العظيم أن يزيل الغمة والبلاء عاجلا.