صدقوني من غير تصدير حقيقي مش هنقدر نوفر دولارات ولا نحل ازمة البطالة ولا نشغل المصانع بكامل طاقتها ولا نعمل حاجات كتير نفسنا فيها.. لو كنّا بنتكلم علي مشروعات قومية مش تنموية نقدر نحقق بيها نقلة حقيقية في مستوي الدخل والمعيشة يبقي لازم تصدير لأنه باختصار هيعمل نقلة حقيقية في كل القطاعات الإنتاجية.. تعالوا نقول يعني ايه تصدير.. يعني مستثمر يضخ فلوس في السوق علشان يبني مصنع وده معناه ان الدولة باعت حتة ارض لمستثمر وبعدين بدأت شركات الانشاءات تشتغل وشغلنا عمالة بناء ووفرنا حديد واسمنت ومواسير مياه وكل الخامات اللازمة للبناء وده معناه تشغيل مصانع وتشغيل عمالة.. ولما ننتهي من بناء المصنع نبدأ ندخل في مرحلة الانتاج ونستخدم خامات محلية في عملية التصنيع وفي الاخر يبقي عندنا منتج نقدر نصدره ونجيب دولارات ونقدر كمان يبقي عندنا استمرارية في تدفق العملة بدل السياحة اللي كل ما حد يعطس تقف وتعمل مشاكل.. وعلشان نخلي التصدير مشروع قومي لازم نفكر ازاي نعمل تعبئة لمجتمع الاعمال لتبني الفكرة.. انا عارف ان جمعية مستثمري العاشر من رمضان بترتب لمؤتمر كبير عن التصدير ومستقبل مصر بس انا اعتقد ان الموضوع محتاج مصر كلها ومحتاج كمان الحكومة وخاصة وزارتي الصناعة والاستثمار ان يشاركوا بقوة في مشروع مصر القومي القادم ويسمعوا كويس لمطالب الصناع ويقدموا حلول وافكار وتسهيلات تساعد علي الخروج من حالة الكساد.. خلوا بالكم السوق المحلي فيه كساد بجد وعلشان كده المصانع بقت تكتفي بوردية عمل واحدة.. والازمات اللي في ليبيا وسوريا والعراق واليمن ضربت الصادرات المصرية.. ومازالت هناك بعض المصاعب للوصول للسوق الافريقي بالصورة المطلوبة.. احنا محتاجين موتمر كبير نحدد فيه ملامح المشروع القومي وتحديد الجهات اللي ممكن تتابع وتنفذ مع وضع خطة زمنية محددة بالارقام والمواعيد.. محتاجين يكون في شراكة حقيقية بين الحكومة والقطاع الخاص.. ومحتاجين كمان نبدأ تأسيس شركات تسويق وشحن عملاقة علشان نلاقي بعد 5 سنين شركات مصرية بتنافس الشركات اللبنانية والتركية في أسواق افريقيا.. الموضوع مش صعب بس محتاج لوبي مصري متكامل يشتغل علشان صالح البلد بجد مش علشان مصالح شخصية.. بلاش نقول ما احنا حاولنا وفشلنا خلينا نقول ان احنا بنشتغل من جديد ومن حقنا نفكر ونغلط علشان نوصل للصح.. مش عاوز احمل الرئيس السيسي اكتر من طاقته.. بس ممكن اطلب من الحكومة انها تدرس الموضوع وتتواصل مع القائمين علي الفكرة ونوسع دائرة العمل علشان نعمل حاجة ممكن تحقق نتائج بجد.. معلوماتي ان ثقافة وتقييم الشعوب تقاس بحجم الانتاج واحنا الشهاده لله ناخد صفر كبير في الموضوع ده.. لما نعرف ان احنا 90 مليون وبنصدر بـ20 مليار دولار بس لا وكمان بنستورد بحوالي 80 مليار واحنا المفروض دولة زراعية وصناعية وسياحية وعندنا غاز وموانئ وقناة السويس وأيدي عاملة ما شاء الله تبني عشر دول.. والله عيب اوي اللي احنا عاملينه في البلد ده وكمان حرام.. اتمني ان يتم التواصل بين المهندس طارق قابيل وزير التجارة والصناعة ومجتمع الاعمال لبدء التشاور حول فكرة إطلاق المشروع القومي للتصدير بشرط ان يخرج بنتائج قابلة للتحقيق لأننا تعبنا من أفكار ومؤتمرات الفنكوش اللي وصلتنا لطرق مسدودة بسبب جهل بعض القائمين علي طرح الأفكار وتنفيذها.. لو نجحت الفكرة هنشوف مصر مختلفة ومش هتتعب في جذب الاستثمارات.. هو احنا بنوقع اتفاقيات تجارية مع كل دول العالم ليه.. علشان نديهم تسهيلات بس ولا علشان نفيد ونستفيد؟.. أزمات مصر الاقتصادية لم ولن تحل الا بإطلاق المشروع القومي للتصدير لأنه سيكون احدي اهم الركائز لجذب الاستثمارات الداخلية والخارجية.. يا رب نفهم.. وتحيا مصر.