د. سارة الذهبى
د. سارة الذهبى


يوميات الأخبار

البنات.. البنات.. ألطف الكائنات

بوابة أخبار اليوم

السبت، 10 أكتوبر 2020 - 07:37 م

 

د. سارة الذهبى

هكلمكوا بعدين لحسن عندى ٥٠٠٠ مسدچ بتاعة فصل ابنى عايزه اقراهم والحق أنام عشان اعمل اللانش بوكس!

من أهم الأسباب اللى تخلى الراجل يحمد ربنا انه اتولد راجل:
- فى طفولتك محدش هيجيبك من شعرك ويفرقهولك نصين بمشط أضيق من خرم الابرة عشان يعملك زعرورتين وآخرة البهدلة دى شكلهم هيطلع يقطع القلب.
- فى طفولتك ملبستش كولون!! متستهونوش بلبسة الكولون لإن الامهات بيجيبوه مقاس ٥ سنين وبيقعدوا يلبسهولنا حشر كده بالعافية لحد أولى ثانوى!! لبسة الكولون دى كنا بنترفع فيها لحد ما الضفرتين اللى سبق ذكرهم يلمسوا فى النجف وبعدها بنتهبد تانى على الأرض وكان الكولون ده سبب رئيسى للشخط وزعيق ونرفزة كل الأمهات الصبح وتكدير لينا لأنه صِغر علينا بس لو مين جه يقنع الحاجة بكده هتقوله لأ... ده على قدها وبتستعبط... وهتفضل تلبسه لحد أولى جامعة عشان تحرم تتبطر على النعمة.
- مش كل دقيقة حد فى البيت يقولك عايز كوباية شاى!! ناولنى كوباية مياه... اطفى على الحلة... وطى على الرز.
- مخدتش النأرزة بتاعة «هتفتحى بيت ازاى يا خايبة» اللى بتتقالنا من واحنا فى كجى تو!! يعنى طفلة لسه ببامبرز ومتوقعين منها تفتح بيت معرفش ازاي؟!
- انك تبقى شايف قدامك كمية ميك آب وبرفانات وجزم بكعب بتاعت مامتك والمفروض تتحكم فى اعصابك كطفلة صغننة ومتلمسش أى حاجة لإنى المفروض افتح بيت وانا حاطة التيتينة فى بؤي!!
- «قومى اغسلى المواعين» اهى الجملة دى لوحدها تخليك تقوم تدبح عجل وتوزعه على الغلابة عشان تحتفل انك مبتسمعهاش! احنا غسلنا كمية مواعين مغسلتهاش شادية فى نحن لا نزرع الشوك!
- الأعياد بقى مقولكش!! موووسم بقى! غسل سجاجيد تلاقي، تنضيف شبابيك موجود، نضفى أوضة اخوكى موجود..
- بنتسأل «ها هنفرح بيكى امتى» من واحنا فى امتحان الترم الأول فى الابتدائية!! والناس بتسأل بجد ومستنية اجابة!! معرفش نوع اللى بيتعاطوه ايه لأنه عامل شغل جامد!
- اترحمت من نفسنة البنات وتلقيحهم على بعض وجو رخيص أوى بنعيشه لو واحدة من صحباتنا اتقرا فاتحتها أو اتخطبت!
- مش مطلوب منك تلبس كارينا!! لبس الولاد بنطلون وتى شيرت وشكراً.... احنا اتخلقنا فى زمن كل اللى فيه مقطّع ومرقع ولو لقيت بلوزة بكم هتلاقيها شيفون فلازم كارينا ومش هقولك غير تباً للكارينا!!
- البنت غالباً لو خرجت بتسمع كلمة «مش كفاية خروج ونتلم فى البيت بقى» حتى لو آخر مرة خرجت كانت أيام فيلم صعيدى فى الجامعة الامريكية... خروج البيت صياعة ولازم طول الخروجة مكالمات كل ربع ساعة كنوع من التقطيم!
- انت بطقم واحد ممكن تحضر بيه فرح وخطوبة وعقيقة وعزا... احنا لكل مناسبة لبس ولكل لبس طرحة وتباً تانى للكارينا!
- لو زهقان بتنزل بشورت وفانلة على أى قهوة وتدفع ٥ جنيه تمن كوباية شاى وتقعد تلعب كوتشينة وتضحك مع صحابك لحد الفجر! احنا أقل خروجة لازم فيها منيمم وبنكُع فيها دم قلبنا ولازم بنرجع بدرى عشان فضيحتنا متبقاش بجلاجل..
- مرحومين من الميك آب... أوحش قلم كحل بقى بـ٢٠٠ جنيه وبيبقى قلم رصاص أصلاً من اللى بيعوروا دول..
- من أول يوم بعد الفرح الناس بتتسائل وبتسأل أم العروسة هى لسه محملتش باستنكار شديد وهى معدّاش عليها ٤٨ ساعة!! شوفوا القُدرة!!
- عمرك ما هتشيل هم فردة شراب ضاعت فى الغسالة او قميص بهت على بلوزة!
- مش داخل على جروبات من بتاعة yay or nay وده يضمنلك حالة نفسية سوية وعمر أطول.. أو جروبات كل دورها روتين تنضيف الشقة أو القبض على زوج خاين أو جروبات المدارس والفصول وأفكار جهنمية للانش بوكس للعيال!
- انتو مبتحملوش.. مبترجعوش... مبتجلكوش حموضة الا لو كلتوا عند صبحى كابر.. مبتجلكوش كرامبات الا لو روحتوا الچيم ودى بتكون مرة كل ١٠ سنين.. مفيش حد بيقعد يشلّت فى بطنكوا صبح وليل ويصحيكوا من النوم..
- مجربتوش الولادة سواء طبيعى أو قيصرى وفتحة البطن كذا مرة وان أمنية حياتك بعد ما تولد تعطس بس خايف من الجرح فا تكتمها! مجربتش طعم المغات والحلبة اللى بنشربهم بالچراكن عشان الرضاعة..
- مجربتوش الرضاعة نفسها وتعبها وان المجتمع يبقى قاعد مستنيلك هترضعى طبيعى والا صناعى كإنها قضية امن عام!!
- مجربتوش تطبّقوا بالأسبوع عشان البيبى عنده مغص او كيفه مش عايز ينام وبعدها تقوموا تعملوا اللى وراكوا عادى خالص!
- مبتسهروش برضيع صغير لذيذ عاشق للزن.. يهوى الأريفة... كاره للنوم... بتدخلوا تقفلوا عليكوا الاوضة وتناموا اسم الله عليكو فى ٥ ثوانى وتتركوا الغلبانة مع الوحش الكاسر لوحدهم، ولو الأبوة نقحت عليكم ممكن تقولولهم من بعيد وهما نايمين ياغتيى حلوة وتمشوا..
- مبتغيروش بامبرز! ومش مرة واحدة لأ خمسميت مرة!! والمفروض تتقبل الاسهال بصدر رحب وتسريب البامبرز بالاحضان وبهدوء تام!
- مبتحمّوش عيال ولا تسمعوا العياط بتاع الشامبو دخل فى عينى اللى بيحسسك فيه ابنك انه بعد الشر بقى ضرير وانك قضيت على مستقبله!! والشامبو أصلاً بتاع لا دموع بعد اليوم!!
- محدش بيتريقلك على طبيخ ولا بيقولك أكل ماما أحلى من أكل مامتك ولا بتهوب للمطبخ من أساسه! ودى نعمة يتدبحلها عجل تانى غير العِجل السابق ذكره فوق..
- مبتذاكرش للعيال!! مبتتجلطش من الغباء الفوجائى اللى بينزل عليهم!! مبتشوفش ولادك وهما بيمشوا على الحيط!! مبتدخلش الحمام ٣٠ مرة فى الساعة.. بتقولهم بس هااااا اخبار المذاكرة ايه؟؟ وتجرى.
- مبتحضّروش لانش بوكس ولا بتدخلوا على ٩٠٠٠ جروب واتس آب ايشى بتاع فصل وبتاع باص وبتاع مدرسة وليلة كبيرة سعادتك!! بتلعب pubg ودمتم !
- مبتدخلش فى مهاترات لمدة ٧ شهور.. ابنك عض بنتى، بنتك قالت لبنتى انتى نووتي، ابنك اكل كراسة ابنى وقلعه الشوز ورماها فى المحيط الأطلنطى والواد رجع يا عين أمه حافى!!
هقولكوا ايه واللا ايه!! هكلمكوا بعدين لحسن عندى ٥٠٠٠ مسدچ بتاعة فصل ابنى عايزه اقراهم والحق أنام عشان اعمل اللانش بوكس!
 راحت فلوسك يا صابر!!
 - يا حسن... يا حساااااااااان.
- ايه فى ايه؟؟ مالك يا ايمان على الصبح؟
- انت استحميت النهارده؟
- انتى جايبانى على ملا وشى من قدام اللاب توب وانا بشتغل عشان تطمنى استحميت والا لأ؟؟
- اتطمن ايه بس.. رد عليا بسرعة.
- اه يا ستي.. استحميت.. خير؟
- حطيت ايه على جسمك؟
- صابون يعنى هكون حطيت ايه؟ زيت قلية؟
- استخدمت الإزازة دى يا حسن!
- اه وفيها ايه يعنى مش دى صابون للجسم؟
- دى حمام كريم بالنخاع موصيه عليه صاحبتى تجيبه من بره، العلبة بـ٣٥٠ جنيه وحضرتك خلصت نصها فى ٣ ثوانى.
- جلّ من لا يسهو انا كنت هعرف منين!! ما هو مش مكتوب عليه بالعربى!! اسبانى ده واللا ايه! وبعدين ايه التبذير ده كله! وبعدين تيجى تقوليلى مصروف البيت خلص، ما هو لازم يخلص!!
- طيب ممكن اعرف ازازة البلسم خلصت كلها ازاي؟؟
- قولتيلي.. هو ده طلع بلسم.. اتاريه مش بيرغّى.. قعدت احط احط احط ملقتوش بيعمل رغوة فا افتكرته باظ اصلا بس كنت دلقت نص الإزازة فعلاً.
- هو انت مبتقراش ليه اللى مكتوب على الازايز يعني؟
- واقرا ليه؟ انا داخل افتح عكّا ده انا داخل استحمى.. انتى اللى حاطة حاجات عجيبة جوه.. فى ٤٠ ازازة معرفش دورهم ايه يعني!! ما تحطى ازازة برت بلس ٢ فى ١ نغسل بيها شعرنا ونستخدمها صابون للجسم بالمرة وننضف بيها البانيو بالسلكة ونخلص!
- اسمه شاور چيل يا حسن.. طيب ممكن اعرف كريم التجاعيد اللى بحطه على وشى بالليل راح فين؟؟
- البرطمان الحوء ده؟؟
- اه.
- دهنت بيه رجلي.. كعوبى اتهرت من الوقفة فى الموقع امبارح.. كنت فاكره زى الڤازلين كده.. هو كان يلزمك فى حاجة؟؟
- لا خالص ده كان للتجاعيد بحط منه لحسة بقالى ٥ شهور عشان ميخلصش لانه غالى جدا بس حضرتك ليطت بيه كعوب رجلك عشان التجاعيد هرتها.. فداك يا حبيبي.
- صحيح لازم تشكريني... كان فى برطمان جواه حاجة محببة كده وريحته قالبه على سكر.. معرفش ايه اللى بيخليكى تطلعى برطمانات من المطبخ!! الاهمال بتاعك بقى لا يطاق والله بس انا رميته عشان كان هيلّملنا نمل واحنا عندنا اطفال!! لو عمر كان اتقرص كان ازاى الحال دلوقتى يا هانم!!
- رميت ايه يا عنيا؟؟؟ رميت علبة السكراب اللى لسه مستخدمتهاش؟؟
- لأ بقولك علبة فيها حاجة ملزقة ومحببة كده... تقريباً مربى شكلها بايظ من كتر ما اهى قاعدة بره التلاجة.. هو ايه السكراف ده؟؟
- سكرااااااف؟؟؟ ده مُقشر للجلد يا حسن!! اقول فيك ايه بس وانت فيك كل العِبر!! كام مرة قولتلك لا انت ولا عمر تدخلوا الحمام من غير اذني؟؟ كام مرة قولتلك متلعبوش فى حاجاتى!! اجيب انا فلوس منين تكفى البلاوى اللى عملتها فيا؟؟
- طيب انا بس كنت عايز اسألك سؤال أخير كان فى باليتة كده دورين فى الحمام كلها الوان مكتوب عليها MAC.. عمر قعد يزنّ عشان ياخدها ويشاورلى عليها مش دى الوان المية بتاعته اللى بيروح بيها الحضانة صح؟؟ لانى طلعتله كراسة التلوين بتاعته واديته فرش مكتوب عليها سيفورا باين وقاعد يلون بيهم بقاله ساعتين.. الوانه دى وفرشه صح؟؟ ايمان... ايمان... طب انتى مش بتردى عليا ليه؟؟ ايه دى هى وشها ازرقّ كده ليه؟؟ ايه التشنجات دى يا ساتر يارب!!! ايمان؟؟ طب اصمدى طيب لحد ما اطلب المستشفى.. ايماااااااااان... بقولك صحيح ابقى قوليلى اجيب منين لكارما انسيال زى اللى وقعته فى التواليت وشدت عليه الكومبينيشن، انا لقيت علبته مكتوب عليها Pandora بس ملقتوش فى محلات دلع البنات اللى على الناصية ولا محلات كله بعشرة خالص.. يلا لما نتطمن عليكى ابقى اخدك واجبلك اتنين من آخر العنقود بدل اللى كارما ضيعته ده... ربنا يطمنا عليكى يا حبيبتى.. عين وصابتك والله.. عين وصابتك..

الكلمات الدالة

مشاركه الخبر :

 
 
 
 
 
 
 
 
 

 
 
 

 
 
 

مشاركة