الجمعة، 13 نوفمبر 2020 - 01:28 م

_ بتعاني من إيه بالظبط يا مدام ؟

*من حياتي كلها يا دكتور 

_ مش راضية عن حياتك ليه ؟ 

*حضرتك أنا عايشة في مجتمع الناس فيه بتتدخل في نوايا غيرها وبيحكموا عليهم ، مجتمع بيقيس الأخلاق بنوعية لبس الست بس ، ومالوش دعوة بالمرتشي ولا البلطجي وحتى المحسوبية و الواسطة مبتهزش شعرة في أخلاقه ، ولو مرة اتعرضت للتحرش هتلاقي الكل بيتهمني أنا مش المتحرش،لبست الحجاب منفعش، ودلوقتي لابسة نقاب وبرضو مفيش فايدة، ناس بيكتبوا على صفحاتهم في "الفيسبوك" (أكثروا من الصلاة على النبي) وهم ياكلوا مال النبي ، مجتمع مليان دواعش مع وقف التنفيذ ، ناس كارهة غيرها لأنهم بس مختلفين عنهم ، ناس نفسهم يبقوا زي الدول المتقدمة ومش عايزين يشتغلوا بذمة ، ناس مبيحترموش العِلم وعايشين على الخرافة ويقولولك هو احنا ليه مش زي "اليابان" أو"ألمانيا"! ، ناس بيكلموك في الحلال و الحرام بس ومالهمش دعوة باحترام القوانين.. تعبت والله يا دكتور    

_كل دا ممكن يتغير طبعا

*ياريت

_التغيير بيبدأ لما الأفكار المنتشرة في المجتمع تتغير 

*صح

_ يبقى لازم نغير المنظومة الفكرية كلها في المجتمع 

*يعني إيه ؟ 

_ يعني نعيد نظر في كل أفكارنا اللي بيسموها ثوابت ونختار منها الصالح والمفيد لحياتنا والباقي نحطه في المتحف 

*عايز تحط ثوابتنا في المتحف يا دكتور ؟! 

_ مش كلها 

*لا لا ..لا يمكن دا الثوابت دي هي أساس حياتنا .

_ أديكي قلتيها بنفسك أهو إن الثوابت دي هي أساس حياتنا .. وانتي بقى مبسوطة بحياتنا ؟ 

* لا .. بس برضو مينفعش نغير الثوابت أوننتقد الرموز 

_ طيب هو احنا عندنا كام من الثوابت والرموز دي ؟ عارفة عددهم؟

 * معرفش بس عندنا كتير والحمد لله 

 _ مش لما حضرتك تعرفي عدد ونوعية الثوابت و الرموز دي الأول تبقي تدافعي عنهم ؟ 

* بص يا دكتور من الآخر مينفعش نقرب من الثوابت و الرموز ولو عندك علاج تاني  

  أوصفهولي 

 _ تمام ..تمام ..شوفي ياستي أولا بالنسبة لمشكلتك مع التحرش لاحظت أن عينيكي الاتنين باينين تحت النقاب خبي عين منهم وجربي يمكن محدش يتعرضلك ولو منفعش  خبي الاتنين وما تلبسيش شرابات ملونة خالص ولو عايزة تحسني أخلاق الناس ومعاملاتهم معاكي هاتي إزازة مية معدنية واغليها في حلة نحاس ودوبي فيهم معلقتين كركم ومعلقة حبة البركة  و5 جرام "حلتيت"ومعلقة "بيكنج باودر"واشربي فنجان قبل ما تنامي لمدة 17 يوم وكل حاجة هتتغير وتبقى تمام .

* تصدق يا دكتور إن أنا بدأت ارتاح من دلوقتي 

_ الحمد لله ..قدر ولطف 

*حضرتك بتكتب إيه ؟ روشتة؟!

_ لا ..دي بس استقالتي .