الأحد، 22 نوفمبر 2020 - 07:05 م

كان حلمنا إن إحنا نعيش فى بلد نظيفة وبلا عشوائيات ويحكمها القانون..كنا بنحلم بمستشفى نظيفة نقدر نتعالج فيها وحلمنا إن يبقى عندنا وسائل مواصلات آمنة ومتطورة..حلمنا كمان إن إحنا نعيش فى أمان..لو نظرنا إلى الواقع الذى نعيش فيه الآن سنجد إن أحلامنا بدأت تتحقق بل إن هناك إنجازات حدثت بالفعل على أرض الواقع بدأت تفوق الأحلام..محدش كان يصدق إن إحنا ممكن يبقى عندنا شبكة طرق بهذا المستوى ولا سكة حديد متطورة..بقى عندنا قانون يطبق على الجميع وإن كنا نطمح فى أكثر من ذلك ولكن قطار العدالة انطلق ويسير فى طريق الإصلاحات..كنا بنحلم إننا نتخلص من الروتين والموظفين اللى بيفتحوا الدرج علشان تخليص المصالح..دلوقتى احنا بنتكلم فى حكومة ذكية واجراءات الكترونية تقلل التعامل مع الموظفين فى المصالح الحكومية..حلمنا إن يبقى عندنا رئيس بيخاف ربنا فى الشعب وبيعمل للمصلحة العامة فقط وربنا اكرمنا وبقى عندنا رئيس وعد إن فى عهده هتبقى مصر جديدة وبدأت الوعود تتحول إلى واقع ملموس..صحيح المشوار طويل ولسه فى حاجات كتير بنحلم بيها بس كمان فى حاجات كتيرة اتحققت وده اللى بيدينا أمل فى بكرة..الحلم الكبير اللى كلنا بنحلم بيه ان الشعب يخاف على البلد اكتر واكتر وان كلنا نشتغل وننتج علشان نقدر نواجه اى مخاطر واحنا أقوياء وعلى ارض صلبة..بنحلم كمان اننا نقضى على الارهاب تماما وده محتاج تعاون كامل من الشعب مع الجيش والشرطة..وبنحلم ان الناس تبطل استغلال بعض وان الضمير يرجع للتاجر..الحلم مش مطالب من الحكومة بس..الحلم ان الشعب كمان يبقى مقدر اللى اتعمل وبيتعمل ويحافظ على كل حاجة..الحلم الأكبر فى هذه الأيام ان الناس تلتزم بالتباعد والاجراءات الاحترازية علشان نقدر نتخلص من كورونا او على الأقل نحافظ على معدل انخفاض الإصابات..سهل ان الاحلام تتحقق لو كانت هناك ارادة قوية واخلاص وضمير حر..لما حلمنا اننا نتخلص من حكم الاخوان اتحدنا كلنا ونجحنا فى ٣٠يونيه اننا نخلص البلاد من حكم الطاغية..كان الخطر بيهددنا بس حلمنا اكبر من الخطر لأننا عاوزين نعيش فى سلام وامان..نعيش فى بلد جديدة كانت اهم ما يميزها ان اهلها ناس طيبين ما يعرفوش الغدر ولا الخيانة كنا بنحلم ان طوابير العيش والبوتاجاز والبنزين تختفى واختفت الحمد لله..حلمنا كمان ان الصحراء تتحول إلى مشروعات سكنية وصناعية وبدأنا نشوف الحلم وهو يتحول إلى حقيقية..الأحلام كتير والإنجازات كتير ومن حقنا نحلم طول ما احنا عايشين بس بشرط لازم نعترف اننا لازم نتعب علشان نحقق الاحلام..الرئيس السيسى بيحقق احلامه علشان بيعامل ربنا وبيشتغل بجد وبيتابع كل صغيرة وكبيرة وبيطبق مبدأ الثواب والعقاب..واحنا كمان محتاجين نعامل ربنا فى كل شىء علشان نقدر نحقق احلامنا ونشتغل اكتر واكتر.. وتحيا مصر.