الإثنين، 23 نوفمبر 2020 - 10:54 ص

وجه الفنان وليد فواز، رسالة إلى رفيق رحلته محمد رمضان، كما وصفه، عبر حسابه على «الإنستجرام» طالبه فيها بالاعتذار عما حدث بخصوص صوره مع بعض الإسرائليين، مشيرًا إلى أن هذا الاعتذار لا يقلل من شأنه.

ونشر «فواز» على صفحته الرسمية بموقع التواصل الاجتماعي "إنستجرام"، صورة لرمضان من البدايات، وعلق قائلًا: «محمد إزيك فعلا واحشني.. محمد رمضان الطموح الموهوب اللي قابلته في بداية الطريق.. محمد اللي لما عمل إحكي يا شهرزاد قابلني في موقف الإسعاف وقالي فواز أنا نازل أشوف صورتي على الافيش.. إحنا هنبقي نجوم جامدين يا له.. بس إنت الأجمد دلوقتي".

وتابع فوز: "واحشني محمد اللي كان بييجي يتفرج عليا في مسرح الشباب ويبدد بحماسه وطاقته التي لا تنضب بالأمل أي شعور بالإحباط عند أي حد بيشوفه.. محمد اللي واحشني هو محمد اللي في الصورة دي.. أنا حابب أحط الصورة دي أكتر من أي صورة تانية ليك دلوقتي.. لو الناس كلها قالت إنك إتغيرت ميخصنيش لإني عارف إنت مين وقد إيه كنت جدع معايا.. محمد اللي أنت وصلتله ولسه هتوصله كمان فعلا تستاهله لإنك مميز وقبولك رباني.. بس اسمحلي يا صاحبي العنيد واللي أعرف عنه من زمان إن دماغه أنشف من الحجر ولا يسمع إلا عقله فقط".

وأضاف: «أطلب منك أن تعيد النظر في اللي بيحصل عشان خاطر جمهورك الحقيقي الناس البسيطة والتي نصبتك ملكا متوجا على قلوبهم..
الناس اللي شافت فيك الأمل، بص من منظارهم للحكاية... بعيدا عن أي مزايدات فيه خطأ حصل واللي حصل حصل وخلاص وأنت كبير وناضج وأب ورب أسرة وعارف أيه الصح وأيه الغلط.. لكن يا صاحبي الإعتذار من شيم الرجال ولا يقلل منك أبدا".

وتابع: "فكر يا محمد عشان خاطر جمهورك الكبير وموهبتك، محبش اشوف واحد بحبه بجد يدفع تمن فاتورة كبيرة قوي هي أصلا مش بتاعته.. محمد أنت ذكي جدا وهتعرف تقعد مع نفسك وتحط اأيدك على الصح.. ربنا يعديك من المحنة دي على خير".

يذكر أن محمد رمضان أثار حالة من الجدل، السبت الماضي، بعد انتشار صور له مع بعض الإسرائليين أثناء تواجده في دبي، وتعرض رمضان لهجوم كبير من رواد مواقع التواصل الاجتماعي.

وفي السياق ذاته، قررت نقابة المهن التمثيلية عقد اجتماع طارئ، اليوم الاثنين، لبحث الأمر.