الجمعة، 11 ديسمبر 2020 - 06:40 م

إذا سألتك أو حتى سألت نفسى ماذا تعرف عن تحسين؟ فمن الطبيعى أن أول ما سيخطر على بالى وبالك أن تحسين هو ذلك الاسم الرجالى الذى كان منتشرا فى الخمسينيات من القرن الماضي.. أو ممكن نتخيل أنه طالب بيعمل (تحسين) مجموع!!
ووارد أن  يخطر ببالك ألف معنى ومعنى للكلمه إلا اللى هقوله لحضرتك حالا.. ولكنى لن أفجر المفاجأة  قبل أن توعدنى أنك مش هتعزل من بيتك لو كنت من سكان محافظة القاهرة!! وإنك أكيد هتفكر تسكن فى محافظة الجيزه أو قنا أو حتى أسوان، وده طبعا أول ما تعرف أنه تم فرض رسوم بقرار من السيد المحافظ على أى عقار (شقة، فيلا، أرض، محل) إسمها رسوم تحسين.. وبعد السؤال والتفحيص تأكدنا أن كل عقار فى المحافظة سيدفع رسوما تقدرها لجنة من المحافظة!! تقولك أننا عملنا هنا رصيفا لتحسين الشارع فعليك أن تدفع رسوما، أو عملنا لك محطة مياه بمنطقتك فادفع رسوم تحسين، أو لقد زودنا كابل كهرباء  فادفع رسوم تحسين!!
وممكن حظك يطلع حلو.. يا حلو وتطلع منطقتك فيها تحسين مياه وكهرباء ورصف وصرف صحي.. وتدفع تحسين بقى عن كل دول مرة واحدة قصدى كذا مرة !! وانت إيه ضمنك أن القرار هيكون قرار  لجنه!! وقبل ما ترفض أو تعترض هيقولك ادفع وبعدين اتظلم.. او سيتم نزع الملكية من حضرتك.. لأن اللجنة اسمها» لجنة نزع الملكية وتقدير مقابل التحسين «.. وقابل بقى التقدير الجزافى مرة، والتقدير العشوائى مرات.. فلا يوجد قانون يضع ضوابط لهذا الأمر.. ولا نعلم لماذا اختص السيد محافظ القاهرة وحده بهذا القرار، الذى يكفى انفراد محافظة واحدة به لبطلانه وإلا لكان تم تطبيقه على جميع المحافظات.. ولا أقولكم كل واحد مش من سكان محافظة القاهرة يحمد ربنا أنه ساكن فى الفيوم ولا السويس.
وأى راجل أو ست إسمه تحسين ياريت  يحاول يختفى من وش محافظة القاهرة اليومين دول وإلا هيدفع رسوم لا أحد يعرفها، ولا يعرف بتتحسب ازاى إلا اللجنة!!. وممكن تطلع كتير ويصادروا ممتلكاتك.. وحتى لو ماعندكش ممتلكات هى تبقى زى عادل إمام فى مسرحية شاهد ماشافش حاجه... تدفع مضطر خوفا من أنهم ممكن يصادروا (العده) ويبقى هو شاهد ماشافش حاجة وانت شاهد  ما (دفعش) حاجة.