الخميس، 24 ديسمبر 2020 - 09:19 م

"بابا يعني ايه ربنا"..سؤال راودنا كثيرًا، وسمعناه من أطفالنا، ولكل منا إجابة تتفق في المعنى ولكن الأسلوب يختلف حسب الخلفيات الدينية والثقافية، والمعتقدات الفكرية، ورغم أن بعض الآباء لا يعرفون كيف يجيبون على ذلك السؤال الهام، إلا أن المبدع الراحل صلاح جاهين أجابه بأخر قصيدة كتبها قبل رحيله.

شاهد أيضا  :حكاية معركة «صلاح جاهين» مع الشيخ الغزالي.. وتدخل نائب رئيس الجمهورية

في أخر أيامه كان جالسًا مع ابنته سامية ذات الخمس سنوات، والتي فاجئته بسؤال "بابا يعني إيه ربنا"، فرد عليها بأخر قصيدة كتبها لتكون تأكيدا على خلفيته الدينية المؤمنة وعقيدته الثابتة، التي لم يؤثر بها الاكتئاب الشديد الذي تعرض له أكثر من مرة.
وقال صلاح جاهين في قصيدته "ربنا":-
مين اللي كوّر الكرة الأرضية
مين اللي دوّرها كده بحنية
مين اللي في الفضا الكبير علّقها
ما تقعش منها أي نقطة ميه
مين اللي عمل البنى آدمين
مفكرين ومبدعين
مين اللي إدانا عقول وقلوب
وشفايف تسأل هو مين؟
مين اللى دايمًا صاحي واخد باله
وكلنا بنحبه جلّ جلاله
ربنا
احنا بنحب ربنا.. وربنا بيحبنا
و يحبنا أكتر كمان.. لما نحب بعضنا
عمل الفراشة بأجنحة وزوقها
وكل فكرة مدهشة حققها
البحر حط له ملح لأجل يعوِّم
وما سابش حاجة إلا لما خلقها
ربنا
مين اللي لما بنطلبه يسمعنا
وف وقت الحزن يشجعنا
ولما نفرح نشكر مين
على إنه بسطنا ومتعنا
مين اللى قلبه علينا واحد واحد
وكلنا بنحبه.. هو الواحد
ربنا
احنا بنحب ربنا.. وربنا بيحبنا
و يحبنا أكتر كمان.. لما نحب بعضنا
سألتني طفلة قلت: هوّ ما بيننا
موجود فى كل مكان وبيبصّ لنا
بيشوف بنسعد بعض ولا لأه
وم الخطر يحرسنا ويحوش عنّا
في كل مكان ربنا موجود
جنب الضعف وجنب المجهود
يا ربنا.. إنت جميل ومفيش في مثلك في الوجود
مين الصديق اللى مفيش غِنى عنه
وكلنا بنحبه ونخاف منه؟
يا ربنا.. إنت جميل ومفيش في مثلك في الوجود
يا ربنا.. إنت جميل ومفيش في مثلك في الوجود