سارة الذهبى
سارة الذهبى


يوميات الأخبار

للغربة وجوه كثيرة

الأخبار

السبت، 26 ديسمبر 2020 - 08:36 م

 

خلاصة الكلام عزيزى القارئ ان تجربة الغربة مش على طول تجربة سعيدة

مفيش بيت فى بلدنا مفيهوش حد متغرب؛ أب.. ابن.. أخ.. أخت.. حتى لو جار أو صديق أو قريب من بعيد؛ لازم هتلاقى كل أسرة فيها مغترب أو اتنين وأحياناً أكتر...
ومن واقع حياتى كمغتربة سابقة لأكتر من ١٠ سنين؛ فحياتك قبل ما تتغرب كوم وبعد ما هتجرب الغربة كوم تانى خالص...
شخصيتك هتختلف ١٨٠ درجة..
نضجك وتقبلك للأمور وقدرتك على التأقلم والتكيّف تحت أى ظرف هتبهرك..
هتحس وانت فى العشرينات والتلاتينات انك بقيت صاحب خبرة زى راجل فى الخمسينات...
الغربة تجربة حياتية مليانة تجارب؛ معظمها صعب ومر وقاسى بعضها حلو وسهل.
جوزى دايماً كان بيقولى: الغربة هى جيش كل راجل مدخلش الجيش؛ تجربة انك تنسلخ تماماً عن أهلك وأصحابك ومعارفك؛ البيت اللى قضيت عمرك فيه؛ الشارع اللى اتربيت فيه؛ المطعم اللى بتحب تفطر ساندويتش الفول والطعمية كل يوم الصبح من عنده؛ الجيران والصحاب اللى عيشت فى وسطهم أكتر ما عيشت فى بيتك... فجأة بتلاقى نفسك وحيد فى كل المناسبات، بتقضى رمضان لوحدك من غير لمة العيلة على سفرة واحدة وبتشيل هم ان العيد ييجى وانت بطولك بعد ما كنت بتستناه طول عمرك.
وحبايبك للأسف بيتعودوا على غيابك سِنة بسِنة..
 >>>
فجأة بترمى ورا ضهرك كل ذكرياتك اللى عيشتها لحظة بلحظة ويوم بيوم؛ وتنقل نفسك وحالك ومحتالك للمجهول بكل ما تحتوتية كلمة مجهول من معنى.
بلد جديدة... أصحاب جداد - ده طبعا اذا لقيت صحاب أصلاً - عادات وتقاليد جديدة، حتى القوانين جديدة بما فيها قوانين المرور والإقامة والإيجار وإلى آخره.
انت نفسك لا بتبقى مرتاح وانت فى بلدك ولا وانت مسافر، تحس ان روحك اتقسمت حتتين ومش عارف تعيش زى باقى الناس...
ومع كل الصعوبات دى دائماً وأبداً بتلاقى المغترب ده محسود على طول الخط من غير ما حد يعرف ظروفه أو عايش ازاى؛ محسود من كل معارفه وأصحابه وأهله على حد السواء. الناس بتبقى متخيلة انه بيشيل فلوس الغربة فى شوال من كترها؛ وانه متمرمغ يوميا فى السعادة وانه بيصيف كل أسبوع فى المالديف وبيسهر بالليل فى لاس فيجاس؛ مرتبه بيقبضه خمس مرات فى الشهر؛ كإن البلد اللى سافر لها بتدفعله تمن الايجار ومصاريف مدارس ولاده وأجرة المستشفى لو حد فيهم تعب وبتدّيله عربية وموبايل آيفون أحدث موديل فوق البيعة!!!
ده غير انهم بيرهقوه بطلبات ملهاش أول من آخر وممكن جدا ميكونش معاه تمنها!
 >>>
أنا هرد على السؤال اللى فى بالكم دلوقتى، بخصوص الفلوس...
مش هنضحك على بعض أكيد المقابل المادى وعروض الشغل اللى بتيجى للشخص اللى قرر يسافر مُجدية جداً بالنسباله والا مكانش فكّر يتغرّب وساعات كتير بتكون فى مميزات صحية ورفاهيات اتحققت له ومكانش هيقدر عليها بمرتبه فى بلده... محدش يقدر ينكر الجانب ده..
ولكن قبل ما نحسد المغترب بعين مليانة على مرتبه ولبسه وعربيته نبص بنظرة أشمل شوية وأرحم شوية ونشوف حياته اللى بيتحسد عليها دى عاملة ازاى من كل الجوانب..
الناس كلها بتتعامل مع المغترب على إنه عايش فى قصر مليان خدم وحشم ويا سلام لو فى دولة خليجية بيعتبروه ثرى عربى المرتب بيتبعتله على حسابه بالدولار واليورو!
مع انك لو سألت المغترب ذاته هيقولك انه لما بيدخل يحط دماغه على المخدة كل اللى بيفكر فيه انه لو جراله حاجة مين هيصلى عليه والا مين هيغسّله والا حتى هيكتشفوا جثته امتى خصوصاً لو قاعد لوحده ومفيش حد يشقر عليه.
هتفتكروا ان السيناريو ده وِسع منى فى الكآبة وانه دراما سودا وفيها تهويل بس ربنا يعلم انه حصل لشباب دفعتنا بالحرف ومش واحد بس، كذا واحد واكتشفوا وفاتهم بالصدفة.. ومحدش هيتفهم كلامى الا المغتربين.. خصوصاً ان موت الفجأة انتشر جداً بين الشباب فى الزمن ده..
هتقولولى طب لو الدنيا سودا كده الناس بتتغرب ليه؟؟
هقولكم إن الدنيا عمرها ما كانت سهلة وأكل العيش مُر وأكيد المقابل المادى اللى بتاخده فى غربتك أفضل من المرتب اللى كنت بتاخده فمش هنحّور ولا هنضحك على بعض....
بس الحكاية مش بتتقاس بماديات وبس... لإن كل حاجة بتاخدها بتدفع تمن قصادها؛ من أحلى أيام عمرك، من شعورك بالوحدة والقلق وخوفك على أهلك اللى بينك وبينهم ساعات طيران وساعات بتوصل لأيام والسيناريوهات البشعة اللى بتحاول تتخلص منها لما الشيطان بيلعب فى دماغك ويزرع جواك الوساوس اللى تخلّى دماغك تودى وتجيب وكفيلة انها تخلع قلبك من مكانه لو سمعت بس ان حد من أهلك تعب أو فى مستشفى أو لا قدر الله اتشخّص كورونا أو مرض خبيث ربنا يحفظلنا حبايبنا بس دى الحقيقة..
أنا لما عرفت حقيقة مرض أمى -الله يرحمها- وكنت مسافرة وقتها، حسيت بمنتهى العجز وقلة الحيلة لإنى مش قادرة أكون معاها فى نفس اللحظة، اتكتفت بسبب امتحانات الولاد وأول ما خلّصوا كنت تانى يوم عندها...
تخيلوا بقى ان فى ناس دفعت تمن غربتها انهم مشافوش أهلهم قبل ما يتدفنوا، عشان الطيران كان مقفول بسبب جائحة الكورونا....
ده قدر ربنا كاتبه وليس لنا من الأمر شىء بس حبيت أشرحلكم احساسهم ساعتها بيكون عامل ازاى والموضوع مفيهوش تهويل على الإطلاق....
ومن خلال تجربتى فى الغربة كنت أعرف ناس كتير أوى عايشين مواطنين صالحين؛ خصوصاً لو سافروا بلد الحياة فيها غالية فى كل نواحيها، يعنى بيصحى الصبح يشتغل ويطلع عينه ويدور فى ساقية يوم ورا التانى ويقعد يدفع فى ضرايب طول السنة وغرامات ورسوم وايجار سكن ومصاريف مدارس واذ فجأة يلاقى نفسه آخر الشهر ما حيلتوش ولا مليم ده اذا مكانش طالع مديون.
هو عايش حياة كريمة ومحترمة بس لو جينا نحسب هو طلع بإيه أو عمل ايه لو قرروا فى الشغل يستغنوا عنه هتلاقيه على فيض الكريم....
ده بخلاف بقى ان معظم المغتربين مبقوش بيحسوا بأى أمان زى زمان...
الشركات بقت بتستغنى عن العمالة فجأة...
أصحاب المؤسسات بيسرّحوا الموظفين حتى لو ذوى خبرة بدون أى مهلة والله أعلم هيدولهم حقوقهم والا لأ !
فالشغل هناك على كف عفريت مش لوزة مقشرة زى أيام زمان...
ولا بقت الناس بتعرف تحوّش فلوس زى زمان عشان الحياة غليت فى كل بلد..
عائلات كتير اتفرّقت وأطفال اتشتت لإن الأب مش قادر يدفع مصاريفهم وهما معاه فقرر يرجّعهم بلدهم ويجرى هوا ورا لقمة عيشه ويشوفهم مرة كل سنة..
خلاصة الكلام عزيزى القارئ ان تجربة الغربة مش على طول تجربة سعيدة زى ما الصور على الفيس بوك بتخدعكم، بل بالعكس فى أحيان كتير المغترب بيتفاجئ انه ضيع أحلى سنين حياته فى لا شىء وانه قعد كل غربته بيجرى ورا سراب...
>>>
فنصيحتى لكل مغترب انه يفكر كويس ويحسب بينه وبين نفسه قعدته وغربته جايبة همّها والا لأ..
سنين عمره اللى بتتسرسب وهو بعيد عن أهله وحبايبه بياخد تمنها والا اللى جاى على قد اللى رايح..
فى مغتربين كتير عايشينها بالطول وبالعرض ومبيحسبوش حساب بكره..
بيعيشوا اليوم بيومه ويبعزقوا تحويشة عمرهم على تفاهات والجرى ورا أحدث موديلات الموبايلات واللبس ولما بيتعرضوا لأزمة فى شغلهم بيندموا ندم عمرهم انهم محسبوش حساب لليوم ده..
ونصيحة لأى شخص متحسدوش حد على حياة انتوا متعرفوش كل جوانبها لإن ممكن لو اتحطيت مكانه تعرف قيمة حياتك اللى كنت فيها فى وسط أهلك وناسك وحبايبك..
لإن كل واحد فينا بيخوض معركة محدش يعرف عنها حاجة للأسف...
وتأكدوا ان الغربة ليها تمن لازم هتدفعه من عمرك وزى ما بتدّيك زى ما بتاخد منك وربنا يعين كل واحد على شيلته وحياته...

الكلمات الدالة

مشاركه الخبر :

 
 
 
 
 
 
 
 
 

 
 
 

 
 
 

مشاركة