الأحد، 03 يناير 2021 - 10:13 م

قال محافظ الإسكندرية اللواء محمد الشريف، إنه لازال أمامه فترة تتراوح بين ثلاثة إلى أربعة أيام حتى تنتهي فترة العزل الصحي الخاصة به.

وتابع المحافظ - في مداخلة هاتفية عبر برنامج "كلمة أخيرة" الذي تقدمه الإعلامية لميس الحديدي على شاشة " ON" قائلاً: «النهارده مش حابب أتكلم كمحافظ لكن كأحد المواطنين الذين أصابهم فيروس "كورونا".. الإصابة ليست سهلة وإنما شديدة.. وعاوز أقول للمواطنين من تجربتي.. كورونا صعبة مش وتؤدي لتدهور الحالة الصحية للإنسان.. التنفس بيبقى صعب أوي.. مش زي الأنفلونزا خالص.. الموضوع  مش سهل».

وتابع: «رسالتي لغير الملتزمين الأمر شديد الخطورة وكل واحد يخلي باله   من نفسه.. وأنا كمحافظ وأثناء عملي ومباشرتي للأمور بشكل ميداني مكنتش حريص بشكل زيادة عن اللزوم أحياناً كنت بقلع الكمامة عشان أكلم الناس  وأرجع ألبسها تاني.. الكلام ده مش هكرره تاني لاني شفت المرض وعانيت منه جدا».

وأضاف: «لما عملت الفحوصات كان الفيروس قد اقتحم الرئة بشدة والآن أحصل على جرعات كبيرة من الكرتيزون  حتى يكون بوسعي السيطرة على المرض والحمد لله أفضل دلوقتي.. وبقول الكلام ده لكل المواطنين.. محدش يعتقد أنه نوع من أنواع الأنفلونزا وهيعدي».

وحول احتفالات كوبري ستانلي في رأس السنة، قال المحافظ: «كنت حزين جداً على المواطن السكندري أكبر من حزني على نفسي وكنت بتخيل لو أنا كنت موجود وقتها كنت هنزل بنفسي وهمنع ده زي ماعملت المرة اللي فاتت ومكنش الموقف كويس.. وشفت كمان فيديوهات كارفور».

وكشف أنه يباشر عمله بالكامل عبر استراحته التي يمكث فيها فترة عزله الصحي، مشددا على أن ما حدث في «كارفور» أمر سيء جداً وغير مقبول.