السبت، 13 فبراير 2021 - 08:01 م

تعودنا شراء مستلزماتنا المعيشية من المحلات الكبرى، أو الهايبر أو السوبر ماركت الكبير. ونسينا للأسف المحلات الصغيرة أو ما يطلق عليه البعض تجار التجزئة. قد يكون بسبب التخفيضات الضخمة التى تعلنها المحلات الكبرى على مختلف السلع، وأيضا قد يعتبرها رب الأسرة فسحة. لكن بحسبة بسيطة قد تضيع هذه التخفيضات فى ركن السيارة أو مخالفة مرورية أو دفع تيبس لحمال الشنط أو حتى فى البنزين الذى تستهلكه السيارة أو أجرة التاكسى. وهذا ماذهب إليه الدكتور أيمن عمر استاذ ادارة الاعمال بالاكاديمية العربية للعلوم والتكنولوجيا والنقل البحرى. لمس الدكتور أيمن ناحية غائبة عن الكثيرمن المواطنين والمسئولين وهى الكساد الذى يشهده التاجر الصغير.

يقول الدكتور أيمن : لم أتمكن من شراء حاجة الشهر من السوبر ماركت الشهير كالمعتاد، وهو ما دفعنى لشرائها من تجمع محلات قريب من سكنى. كانت الساعة تقترب من الحادية عشرة مساء دخلت محل منظفات لاقيت اللى قاعدة فيه ست أواخر التلاتين ومقعدة بنتها جنبها وبتذاكرلها، وأنا بشوف هاخد ايه جالها تليفون فهمت منه (دون قصدمنى) إنها أرملة وصاحب البيت بيطلبها علشان الإيجار المتأخر عليها ومش قادرة تدفع وهى لم تعلم من كتر الهم انى واقف باشترى منها ولاهى دارية باى شيء،

المهم خلصت عندها ودخلت محل الأدوات المنزلية اللى جنبها وأنابحاسب الراجل اللى قاعد لاقيت صاحبه بيقوله شفت بقى ياعم وشى حلو عليك ازاى كنت عمال تقول الحال واقف ومفيش بيع،

خرجت من الأدوات المنزلية لمحل الخضار والفاكهة اللى جنبهم، و أنا بوزن حاجتى لاقيت ابن صاحب المحل بيقوله يلا بقى يابا أنا هموت من البرد، رد عليه الراجل : اصطبر يا واد ده ربنا رزقنا فى ساعة زى دى عشان عالم بحالنا.

الخلاصة بعد كل الرغى ده أنا عايز أقول إن الناس اللى عندها محلات صغيرة زى دى تعبانة جدا وحالها واقف ومعندهاش دخل شهرى ثابت وبتنحت فى الصخر عشان تجيب لقمة عيش لعيالها والبلد حالها صعب أوى.. فلو مش فارقة معاك وربنا ساترك..دور على المحلات دى جنبكواشترى منها بدل ما تروح تشترى من محلات كبيرة أصحابها مليونيرات عشان توفر جنيه ولا إتنين وتلاقى نفسك فى الآخر لا وفرت ولاحاجة. واعتبر ده نوع من أنواع الصدقة المخفية اللى ربنا هيردهالك أضعاف أضعاف فى رزقك.

نحن نؤمن بأن الأرزاق بيد الخالق، وعلى الإنسان ان يكد ويتعب ليواجه مصاعب الحياة، لكن من الواجب على الدولة والمواطن مراعاة هذه الفئة من تجار التجزئة الكادحين البسطاء.

دعاء : اللهم يسر أبواب الرزق الحلال لعبادك.

[email protected]