الجمعة، 19 فبراير 2021 - 11:41 ص

 تحدث النحات عادل محمود عن قصة بدايته في العمل بهذه الحرفة، قائلا: «الموضوع بدأ معايا منذ الطفولة، كنت بنحت وبرسم، وحاولت أضيف لنفسي فاشتغلت منحوتات على الطين، تعبر عن الوادي الجديد، مسقط رأسي، في البداية كنت بشتغل حاجات لنفسي، لأن فيه نحاتين كتير، فأنا عاوز أفيد البيئة اللي حواليا بحاجة جديدة».

وأضاف «محمود»، خلال لقاء ببرنامج «صباح الخير يا مصر»، المذاع على عبر شاشات القناة «الأولى»، «فوجدت أن لحاء النخيل مهدرة ولا يوجد لها أي دور في البيئة بتاعتي، كما أنها بتكون عائق بيئي لأنها بتتحرق، فرأيت أنها من المقومات اللي ممكن تنهض بنا كمصريين، ووظيفتها في العمل بتاعي كمنتج».

وتابع: «لقيت فيها مقومات ساعدتني على التعبير والإحساس والكسب من ورائها ماديا، وليها مميزات أنها خفيفة الوزن وصلبة، ومش هدفع فيها فلوس لأنها خامة موجودة عندي، مش أي حاجة نستهين بيها، وممكن نوظفها توظيف صح بأي شكل، كديكور منزلي وعارفين مصدرها».    

وواصل: «أصعب حاجة إني في قرية محدودة، والمفهوم كان بعيد عنها، ولكن مدام قدامك هدف فلازم تسعى وراه، متفكرش في أي حاجة سلبية، لأن كده هيرجعك لورا، فيه ناس في البداية كانت بتقولي هتستفيد إيه؟، ومفيهوش أي تسويق، بس قولت هطلع اللي جوايا».