الجمعة، 19 فبراير 2021 - 01:32 م

اعتذر الإعلامى تامر أمين، عن إهانته لأهالي الصعيد فى برنامجه، وقال في فيديو صباح اليوم الجمعة: «أقدم اعتذار واضح وصريح لكل أهالينا فى الصعيد وفى كل مكان بمصر، اللي زعلانين مني، أنا لا هكابر ولا هآوح، أنا من الناس اللى تعتذر لما تحس إن الناس زعلانة منها، حتى لو كانت نيتى يعلم بيها ربنا نيتي خير وكان الهدف هو المصلحة العامة».

وأضاف تامر أمين: «أنا أكتر حاجة تضايقنى فى الدنيا إن واحد صعيدي بس أو واحدة صعيدية بس يزعلوا مني، وأنا من أكثر المؤمنين بالصعيد واحترام الصعيد وعزة نفس الصعيد وكرامة الصعيد وأصل الصعيد، صعيد مصر هما أصل مصر اللي طلعولنا الناس المفكرين والأدباء والناس الشريفة المحترمة».

وتابع تامر أمين: «والله ما قصدتش الإهانة أبدأ، ودي آخر حاجة تيجي على دماغي، وآخر حاجة في الدنيا إن يبقى حد صعيدي زعلان مني، فانا بقول لكل صعيدي وصعيدية جزمتك على راسي من فوق، وأنا ابنكم وأنا ابن ريف مصر، ونسايبي أساسًا من الصعيد مرات أخويا من الصعيد وبتشرف بيها وبالنسب ده».

واستكمل تامر أمين: «أرجوكم متزعلوش مني وحتى لو كان قصدي خير بس لو واحد فيكم بس زعلان أنا بقوله حقك عليا وأنا آسف فى اعتذار صريح وهذا الاعتذار سينشر في كل مكان».