الأربعاء، 24 فبراير 2021 - 08:04 م

بقلم : رنا عبد العزيز

جدتى قعدت جمبى تقولى، بصى يا بنت الغالى شوية سيبى تليفونك من ايديك وتعالى قبالى اسمعى منى، لو جيتى تحبى وقلبك مال حبى اللى يكون ليكى حلالك يبقى شاريكى ويسند فيكى ويكون ضلك ويقول ديما فيكى قصايد، حبى اللى يشوفك أعلى مقام من جنة ويسرا وسعدية وأوعى من اللى يقلل قيمتك أو حتى يشوفك نكدية.
 

اسمعى منى بس قوالتى ده كلام خبرة أيام وسنين، حبى اللى يقولك «يا حبيبتى» قدام أمه وقدام جارته الحلوة دهيا وقدام سيد صاحبه الأنتيم، وأهم من كل دا بقى ميطلقكيش يوم صباحيتك، ده أنت يا بنت ابنى شهادة لله أوقات تصحى بوزك شبرين، صوتك يشبه الواد حسنين.

يا حبيبتى الأخلاق دى جميلة لكن ونبى سبسبى شعرك وقوليله يا بيبى صباح الخير، لحسن تلقى فيوم سنيورة خطفت بعلك.
 

واوعى فيوم ريحة التوم تلقط فيكى، خليكى فواحة وحطى خيار تحت عنيكي، وأهم من ده يا بنتى خليكى أصيلة وقوية وبسره فيوم لا تبوحى ولا حتى تقولى لشوقية.
 

اغلطى واعترفى بأخطائك ونكابر ليه!
ده شيطان الواحد يا حبيبتى ديما بيصمم يلعب بيه، نرجع بقى تانى لموضوعنا حبى اللى يصونك فى غيابك وعنيه بيكى تكون مليانة، حبى اللى بيفهم تفاصيلك، حبى اللى يصلح أخطاءك ويشوفك أجمل بنوتة ولا يعرف يبقى مع غيرك ولا يقدر ينسى الحدوتة، وإن جالك مرة وقال محتاجك ارمى اللى فى ايدك وأفضيله. 

اسمعى منه وهونى عنه مهو بردو أول أولادك، أنا عشت كل التفاصيل دى وبقولك خبرة أيامى، يالا امشى يا بت يا رغاية طفى النور طولنا كلام، امسكى تليفونك من تانى وقوليله يجيلك يتقدم لأحسن هحكى لأبوكى فى مرة وأخليه يجيبك من شعرك أنت والبت أختك أحلام.