الأربعاء، 03 مارس 2021 - 07:19 م

كلمات بنسمعها كتير من الرجل المصري مهما بلغ مستواه التعليمي أو اختلفت ثقافته، تلاقيه بيعزم عليك بإصرار وشهامة ويحلفك علشان تنفذ جدعنته، بس المشكلة إننا بنخلى بيوتنا عرضة لتنفيذ مطلب بسيط فبنقلل من قيمة حياتنا، ونخلى كلمة الطلاق سهلة، وفى ناس كمان للأسف مش بيستخدموها فى الجدعنة زى ما قلنا، لكن بتبقى حياة الست مهددة طول الوقت إن جوزها يحلف عليها طلاق!! لو نزلتى انت طالق، لو اشتغلتى انت طالق!! هى دى حياة ممكنة أو مقبولة يا خلق للست اللى هى بتدور على الأمن والأمان والحماية فى جوزها!! وهو الكلام دا كمان يخلى الحياة تستقر فى البيوت وكمان أدام الأطفال!! ليه بنتفه حياتنا ونسفهها للدرجة دى!! ليه رغم إن ربنا وضع ميثاقا غليظا بين الزوجين، نمنع نفسنا من الخير، ونبدل وصف ربنا للجواز من مودة ورحمة لتعاسة وشقاء!!
الحقيقة أما بسمع الكلمة دى فى أى مكان بحس بمهانة كبيرة للست وولادها اللى حياتهم بقت فى كفة أدام غدوة أو عشوة أو بيعة وشروة، يا ريت نعرف إن دى أمانة وعلى الراجل إنه يراعيها ومايستخدمش حقه الشرعى فى التطليق بالشكل المهين دا!! نسب الطلاق بتزيد كل يوم والبيوت بتتهدم والعيال بتتشرد، بيوتنا أمانة محتاجة رعاية، ومش لازم يحصل ونرجع نسأل الشيوخ ودار الإفتاء ونفضل فى حيص بيص هى الطلقة التالتة ولا التانية!! جوزى اتحرم عليا ولا محتاجة محلل!! يا ستات ماتقبلوش حياتكم ترخص كدا!! ويا رجالة انتبهوا إنه أبغض الحلال!! إحنا فى غنى عن كل دا ونفتكر دايما إن الاتنين سند وسكن لبعض وهى دى الحياة.