السبت، 06 مارس 2021 - 12:26 ص

استنكر الإعلامي عمرو أديب، تلويث ترعة العزيزية بمحافظة الجيزة، قائلًا: "الدولة بتصرف مليارات  الجنيهات على مشروعات تبطين الترع وبتضيع في الهوا" مضيفاً: "يا جماعة لو مش ناويين تاخدوا بالكم، قولوا لنا بدل ما نصرف فلوس على الفاضي.. أصبح لدى المصريين تدمير ذاتى".

اقرأ أيضا | أديب: بعد صرف الملايين على تبطين الترع المواطنين رموا فيها الزبالة

وطالب "أديب"، خلال برنامج "الحكاية"، الذي يعرض على قناة MBC مصر، اليوم الجمعة، الحكومة المصرية بوقف مشروع تبطين الترع، قائلًا: "المصريين مش عاوزينه، المصريين بيبوظوه، وقفوا الكلام ده حرام، دي فلوس بتروح، ليه بعض الناس متخصصة إنها ترجعنا لورا".

وتابع: "مهما المحليات عملت، بعض الناس قرروا إنهم يرموا القمامة في الترع كعقاب رسمي، يبقى خلاص يقولوا لنا، كدة التبطين والفلوس اللي بنرميها في الأرض ملهاش لازمة، والمزارع اللي بنوصل لها المياه، نوصل لها المياه بالعربيات، ونلغي ونسطح الترع بجبس وأسمنت".

وأردف أديب قائلا: "إنتوا  ليه بتعملوا في بلدكم كده، فيه مليون طريقة نخلصها بيها من الزبالة، يا جدعان مفيش مياه، عندنا مشكلة مياه، ومينفعش اللي بيتعمل في المياه" مشيرا الى أن نفس السلوك تكرر في أكثر من محافظة على مستوى الجمهورية في الترع والمخرات: «مبقيناش بنعمل حاجة غير إننا قاعدين نشيل زبالة من مجاري المياه".