الأربعاء، 17 مارس 2021 - 07:27 م

- اعمل حسابك يا حسين يا ابنى انك حاتسافر لندن تكمل تعليمك.
- ايوه يا بابا بس حضرتك يعنى عارف إنى...
- مابسش ولا حاجة انا خلاص رتبتلك كل حاجة.. جهز باسبورك عشان تسافر الاسبوع الجاى تلحق التيرم التانى من أوله
- ايوه يا بابا بس حضرتك يعنى كده فاجئتنى!
 - ده بدال ما تفرح وتيجى تبوس ايدي؟ الحق عليا يعنى اللى عايزك تتعلم فى هندسة لندن؟ يعنى أحسن جامعات فى العالم؟
- وهندسة الوادى الجديد مش وحشة يا بابا.
- مش وحشة اوك لكن إيش جاب لجاب؟
- مع احترامى لك يا بابا ولهندسة لندن أنا مش عايز اسافر.
- انت بتقول إيه يا ولد؟
- زى ما حضرتك سمعت كده بالظبط وكان لازم تاخد رأيى.. هى دى الديمقراطية اللى حضرتك ربتنى عليها!
- الظاهر انك محتاج تتربى من جديد يا ولد.. واضح إن ماما دلعتك انت وأخوك زيادة عن اللزوم.. والله عال.. قال ديمقراطية قال.. حد تجيله فرصة زى دى ويضيعها؟
- ايوه يا بابا لأنى عارف السبب الحقيقى.. حضرتك عايزنى اروح أشجع ليفربول وابطل تشجيع ال...
- ماتكملش ماتكملش لهو انت لسه بتشجع ال...
- ايوه يا بابا انا لسه باشجع الزمالك...!
-  وكمان بتنطقها فى وشي.. انت مش وعدتنى انك حاتبطل تشجيع الزمالك.. انت يا بنى عايز تموتنى ناقص عمر؟
- بعيد الشر عليك يا بابا بس انا فعلا حاولت لكن مقدرتش ثم لو فعلا حضرتك عايزنى أسافر عشان الدراسة مافكرتش ليه تبعت معايا احمد أخويا يدرس هناك بدال آداب بنها اللى هو فيها دى ولا اكمنة اهلاوى؟
- اسمع يا ولد انت كده بتتجاوز حدودك.. انا قلتها كلمة وخلاص.. حاتسافر وحاتشجع ليفربول غصب عن اللى خلفوك!
- بس يا بابا انا لو سافرت مش حاسافر لوحدى!
- مش فاهم.. عايز ماما تسافر معاك شهرين تلاتة مثلا
 - لا يا بابا انا حاسافر انا ومراتي
- هاهاها قول بقى انك عايز تتجوز.. وما له مش عيب ولا حرام.. سافر بس انت الأول لوحدك لغاية لما تتخرج وبالمرة تنسى موضوع الزمالك ده نهائي.. واوعدك يا سيدى ساعتها اجوزك بنت اى واحد من رجال الأعمال أصدقائى وتسافر بيها لندن تشتغل هناك وتستقر فيها لو حبيت.
- لا يا بابا انا لو سافرت حاسافر انا وسهير مراتي!
- سهير؟ انت بتتحدانى يا ولد؟
-  انا بس استخدمت حقى فى اختيار شريكة حياتى وبعدين احنا الاتنين ومن صغرنا بنشجع الزمالك سوا وكبرنا والهوا كبر ولا حد م الدنيا قدر يفرقنا عن بعضنا!
- انت كمان حاتغنيهالى طب خد دى طرااااااااااااااااخ!
- بتضربنى بالقلم يا بابا على وشى عشان لأول مرة استخدم حقى فى حاجة تخص مستقبلي؟
- حقك؟ حق إيه يا بو حق.. إنت ملكش أى حقوق فى البيت ده!
- نفسى أعرف ليه حضرتك بتفرق دايما فى المعاملة بينى وبين أخويا احمد.. ليه محسسنى كما لو كنت مساحة زيادة عندك مطلوب منك تدفع عنها رسوم تصالح؟ ليه زى ما يكون أحمد متسجل عندك فى الشهر العقارى وانا مجرد صحة توقيع هو أنا مش ابنك ولا إيه؟
- لا مش ابنى ولا أعرفك.. احنا لقيناك فى حتة ضلمة فى ميت عقبة ملفوف فى شال أبيض بخطين حمر!
- معاك حاجة تثبت الكلام ده؟
- أيوه معايا سديهاية عليها كل حاجة!
- مش قادر أصدق ياريتكم كنتوا سيبتونى مرمى فى الشارع
- عموما قدامك حل من اتنين تقعد فى مصر وتنسى الزمالك وتبقى اهلاوى ولا تسافر لندن وتشجع ليفربول؟
- إحنا مش ممكن نشجع غير الزمالك.. حاسافر أنا وسهير ولا نشجع فريق غيره.. سنظل أوفياء يا بابا.. قصدى يا محمود بيه!