الأربعاء، 14 أبريل 2021 - 06:09 م

ملف وورد 5 ميجا من مراتى
ف قولت أكلمها احتياطى
يمكن تكون أخر مكالمة
كل قرض وأنت طيب..
ودى طلبات رمضان.. مش طلباتى
قولتلها ربع ساعة.. حضّريلنا طقم شاى
وأنا رايح أجيب رمضان وجاى
بالمرة نعرف منه..
إيه علاقته بالقطايف
والعديد م المشروبات؟
وهل يجوز أن الكنافه تبقى مش بمكسرات؟
ينفع نقلل اللحوم ونهدّى بورصة الفراخ؟
أفراننا غيّرت المناخ!
صلة الرحم مش يعنى كل يوم عزومه
حرام عليكى
ليه تبقى إنتى والحكومة
طلبات كتيرة.. أكتر من طلبات عرابى
قولتلها أنا موظف مثالى
مش عضو ف تشكيل عصابى