د. رانيا يحيى
د. رانيا يحيى


شهرزاد

الاختيار خيارنا يا عرسان الجنة

الأخبار

الأربعاء، 21 أبريل 2021 - 06:08 م

 

محنة صعبة مافيش أصعب منها أما قلب الأم يتكوى بنار ضناها اللى راح ضحية للغدر والخيانة، لكن اللى يبرد قلبها إن ابنها راجل بيحمى بلده وبيحمى ناسه أرضه وعرضه، عقيدة عند رجالة بلدنا إن الأرض عرض، وولاد بلدى مايفرطوش فى عرضهم أبداً. أحداث كتير عشناها وشفنا التحديات بعينينا وسمعنا كوارث قتل ودم وضحايا، علشان احنا نعيش فى أمان دفعوا الثمن غالى أوى، بس مش أغلى من مصر.
الاختيار بيأكد لنا كل يوم إن هو دا خيارنا الوحيد بلا منازع، بيحرك فينا مشاعر الوطنية وبيذكرنا بأحداث مؤلمة بس مهم أوى إننا نفتكرها، مش بس، لكن كمان نتعلم يعنى إيه تضحية، ويأكد لنا قسم ولادك يا مصر المحفوظ على الجبين، ويقول لنا إن الست المصرية عرفت تعلم وتربى رجالة، يتضرب بيهم المثل فى كل مكان. وأما نشوف وقائع ونتخيل اللى حصل فى كل حادثة من دول بتفاصيلها بنحس بالتار وإن بجد ولاد بلدنا دول دمهم فى رقابنا كلنا، وإن معدومى الدين والضمير مصيرهم إلى زوال.
المصريين مقدرين كم التضحية، وعارفين إن الاختيار له ثمن من 2013 ولغاية دلوقتى، والله أعلم الدور جاى على مين، ورجالتنا بينزلوا مهماتهم وبيأدوا أدوارهم وكل واحد عارف إنه ممكن مايرجعش تانى، إحساس قاسى ومؤلم بيعيشوه أهالى العسكريين كل يوم وكل لحظة بس الجميل إن الناس كلها تحس وتعرف وماينسوش، ويشوفوا بعينهم الفجرة بيقتلوا ولادنا ويحاولوا يدمروا بلدنا، لكن على مين!! والله لو هنموت كلنا فداها ستات ورجالة وأطفال عمرنا ماهنسيبها ولا هنخذلها، وهيفضل الجيش والشرطة إيد واحدة سند لنا ولبلدنا، ومبروك عليكم الجنة يا عرسانها، ومبروك علينا الاختيار.

الكلمات الدالة

مشاركه الخبر :

 
 
 
 
 
 
 
 
 

 
 
 

 
 
 

مشاركة