الأحد، 06 يونيو 2021 - 02:27 ص

كشف الإعلامي شريف مدكور، سبب رفضه التام التجاوب وتقديم المساعدة إلى أفراد يطلبون الأموال منه عبر مواقع التواصل الاجتماعي على سبيل «السُلفة»، حيث قال «مش أول مرة أكتب بوست زي ده، كل سنة بكتبه، عشان بيجيلي رسائل يومية من ناس مختلفة تطلب منه أموالًا، على سبيل المثال واحدة تبعت تقولي مساء الخير يا أستاذ شريف بعد إذنك عاوزه استلف منك 100 ألف جنيه عشان اشتريت حاجات وجوزي ميعرفش وعليا ديون، ادهملي وأنا هدهملك بعد سنة».

وأضاف مدكور، خلال مداخلة هاتفية في برنامج «الحكاية»، مع الإعلامي عمرو أديب، الذي يُعرض على شاشة «mbc مصر»، أنه يصدم من هذه الرسائل ويكون الرد عليها «لا يا فندم بعتذر لحضرتك»، لكنه يجد الرد عليه «ليه لأ، ما انتوا بتقبضوا ملايين قد كده»، موضحًا أن شخصا آخر أرسل له رسالة يقول فيها «أنا اشتريت موبيل بس عشان مفيش شغل من 4 شهور مش قادر أدفع القسط بتاعه وعاوز 6 آلاف جنيه»، موضحًا أنه كتب هذا البوست من أجل أن تكف الناس عن تلك الطريقة.

وأوضح مدكور أنه وجد هجوما غير طبيعيا من الكثيرين، «رغم أن الناس دي لا من عائلتي ولا من أصدقائي في العمل ولا زملائي، دول لو مزنوقين هسلفهم، إنما دي ناس معرفهاش، وبعدين إيه بتقبضوا بالملايين فسلفونا دي، الأمر غريب»، فرد عليه عمرو أديب: «أنت من فترة عملت فيديو وأنت في البيت بتاعك، ناس كتير شافت عندك بيت حلو، ناس كتير قالت ما يسلفنا ما نبعت له»، فرد عليه شريف مدكور: «والله من قبل موضوع البيت بيحصله كده، ولقيت ردود لناس في سكة مش عارف فيها إيه ما تسلف الناس».

وتابع مدكور «ناس قالت ما الناس دعيت لك وأنت عيان ما تسلفهم، مش عارف ليه دخلوا الأمور في بعض، مش قادر استوعب، أنا شخصيًا وأنا عيان مطلبتش من حد يدعيلي، طلعت قلت حالتي الصحية، بس مستعطفتش الناس وقولتلهم ادعولي، ومش هعمل كده، الناس كده بتطلب بطريقة فجة، الموضوع كبر قولت اكتب البوست ده عشان محدش يبعت لي، ولسه بيبعتوا حتى بعد ما كتبت البوست»، موضحًا أنه حال عرض عليه حالة صحية لمريض لا يستطيع العلاج أو أسرة لا تستطيع دفع مصروفات المدارس قد يتدخل.