الأربعاء، 16 يونيو 2021 - 06:26 م

«محلاه اليخني من إيد جدتي.. أنا كنت بستنى اليوم إللى بنروح عندها عشان أكل أحلى يخنى»، بهذه الكلمات بدأت الفنانة انتصار حديثها، وأضافت: «كل أكلات جدتي كانت رائعة وجميلة بس اليخني خارج المنافسة».

وأضافت: «انا مهما أكلت اليخنى فى أى مكان مش بلاقى أى منافسة بينه وبين جدتى لأنه كان أشهى وأطعم بكتير»، وقالت: «جدتي كان ليها طريقه مميزة في اليخني وعمري ما قدرت انسى طعمة».

وأضافت: «كنا بنتلم على سفرة جدتى وننتظرها لما تخلص الأكل إللى كان أشهى وأطعم من أى أكل تانى وكانت جدتى بتعمل اليخنى من البصل واللحم الصافى من غير أى مواد دهنية»، وقالت: «كنت تحس انه بيسحر العقل مع كل معلقة منه حقيقى مفيش أطعم منه».

وعن طريقة التحضير، شرحت الفنانة انتصار قائلة: «فاكرة كويس جدا كانت بتعمله إزاى.. الأول بتقطع بصل بكمية كبيرة جدا، وتكون فى نفس الوقت بتغسل اللحم، وعقب ذلك كانت تقوم بوضع قطع اللحم مع البصل بدون أى مواد دهنية».

وأضافت: «كل نص ساعة كانت تضيف ربع كوب مياه، لحد ما يستوى تماما، ونغرف بقى فى الأطباق وندوب داخل الطعم اللذيذ الشهى».

أما عن الحلو، فأشارت انتصار، إلى أن جدتها كانت تبدع فى عمل «المفتقة»، فكان لها مذاقا خاصا، واعتادت دائما على عمل ٢٠ برطمان منها وتقوم بتوزيعها على الجيران والأهل.