الأربعاء، 16 يونيو 2021 - 06:36 م

نقطه مهمه
نقطه تغيّر معنى الكلمه
نقطه تجامل ف الأفراح
وفلان جاتله النقطه وراح
راح النقطه يبلّغ عنّى 
وأنا مستنى ف أقرب نقطه

نقطه مهمه.. 
بتغيّر تركيب الكيميا
و تغيّر ترتيب الدورى
وفريقى بيخسر ويسرّب
والسبّاك عمره ما جه بدرى

نقطه تحطها تنهى الجمله
تكسبها ف تغيير العمله
نقطه بتفرق فى التموين
تقضى على دهون المواعين

أنا مش قاصد أوصّل حاجه
لكن حابب أوضح نقطه