الأربعاء، 30 يونيو 2021 - 07:11 م

بعد مرور أقل من ٢٤ ساعة على نشر حوارى مع الرئيس الأمريكى إبراهام لينكولن محرر العبيد فوجئت برقم برايفت يتصل بى بإلحاح، أقلق جدا من أصحاب الأرقام الخاصة فى مصر فما بال بأصحاب تلك الأرقام فى أمريكا؟! فى البداية لم أرد فتكرر الطلب عدة مرات مما زاد من قلقى فتمتمت بدعاء: يجعل كلامنا خفيف عليهم وضغطت على زر الاستقبال فكانت هذه المكالمة:
- هذا هو ثيودور روزفلت يتحدث، هل انت الصحفى المصرى فلان الفلانى؟
- ايوه هو بغباوته، لكن حضرتك مصحينى من أجمل نومة وأنا ما صدقت اظبط نومى فى واشنطن علشان تهزر الهزار السخيف ده؟
- انا مش باهزر يا بنى انا فعلا ثيودور روزفلت الرئيس الأمريكى السادس والعشرين!
- طب ما تقول تيودرو وخلاص لازم يعنى تتفزلك وتطلع لسانك فى الثاء؟ عموما أفندم ياسى تيودرو أى خدمة اقدر اقدمهالك؟
- ايوه عايزك تكتب عنى مقال ولا يعنى هو إبراهام أحسن منى مثلا ولا كان أحسن مني، ولا عامل نفسك من جيرسى مثلا ومش مهتم بمقابلتي؟
- لا مش عامل من بنها ولا من جيرسى وكان يشرفنى اقابلك لولا عملتك السودة اللى عملتها مع السود هنا.
- يعنى نسيت كل إنجازاتى اللى عملتها ومش فاكر غير الغلطة دى؟
- ايوه يا روزفلت يا مزفت خلينى أكون صريح معاك انا اكتر حاجة باكرهها فى حياتى العنصرية والتمييز بين الناس لأى سبب واللى انت عملته مش شوية.
- دول كلهم ١٦٧ جندى عزلتهم من الخدمة.
- عزلتهم بعد خناقة بين السود والبيض مات فيها واحد ابيض، واللى زعلنى منك بجد انك انتظرت الانتخابات خلصت وكل السود صوتولك وبعدين غدرت بالجنود وعزلتهم وكمان حرمتهم من أى معاشات.
- يا اتش الموضوع أعمق من كده بكتير وأنا كان ليا مواقف كتير ضد التفرقة والتمييز حتى لو ضعفت مرة ياخى مش معنى كده تمسح تاريخى باستيكة!.
- عارف ومقدر اللى عملته فى مجال البيئة وأنك كنت عدو الأسفلت وعاشق للخضرة والجنائن، ومحدش يقدر ينكر دورك فى محاربة كل أشكال الاحتكار ودورك فى إنهاء الحرب الروسية اليابانية واللى فزت بسببه بنوبل السلام، لكن إسمحلى ياتيد يا خويا ماتنكرش انك تدخلك مكانش لوجه الله، انت كنت خايف اليابان تهزم روسيا وده كان ممكن يخل بتوازن القوى فى المحيط الهادى وده كان ممكن يكلف أمريكا كتير عشان تعيد التوازن!
- مش عيب ولا حرام أنى أحط مصلحة بلدى فوق كل اعتبار، وبعدين مش ملاحظ انك مركز معايا فى السياسة وبس؟
- فى عندك حق يا روزفلت، فعلا أنا باحترم فيك انك كنت مفكر وفيلسوف ومؤرخ وكاتب كبير ولك ييجى عشرين تلاتين مؤلف فى التاريخ والجغرافيا والأحياء والفلسفة.
- واسمحلى بدون غرور أفكرك بيوم ما انضربت برصاصة واصريت أكمل خطابى تسعين دقيقة وبعد ما خلصت لولا ما سمحت للدكاترة ينقلونى للمستشفي!
- إيه الأفلام الهندى دى يا عم ليه تكونش أميتاب باتشان فى شبابه؟!
- بلاش تريقة واخطف رجلك لمكتبة الكونجرس واقرا تاريخ كويس!
- خلاص يا سيدى مصدقك، هو انت مش بتحب القفشات ولا إيه؟
- خلاص فهمتك وأرجوك ما تزعلش منى يا اتش واضح ان قلبك أبيض رغم لونك الأسود!
- فعلا عمر اللون من بره ما كان دليل على اللى موجود فيه من جوه بدليل ان البيت اللى سيادتك سميته البيت الأبيض طول عمره اسود من جوه والحدق يفهم يا روزفلت!