الإثنين، 05 يوليه 2021 - 10:46 م

حرص الإعلامي عمرو أديب، على إحياء الذكرى الأولى لرحيل النجمة الكبيرة رجاء الجداوي، بعرض مجموعة من الصور للفنانة الراحلة ببرنامج "الحكاية".

 وقال أديب: "كانت أجدع ست في مصر ونموذج للمرأة العاملة بجد".

وتابع عمرو أديب: "أنا ما كنش عندي ربع الطاقة بتاعتها، مفيش فرح ولا سبوع ولا عزا ولا أي حاجة غير ورجاء موجودة فيه، ماحدش يقدر يكره رجاء أبدا، ومافيش حد مالهوش في رجاء، أنا كنت بستغرب أوي من كمية رجاء الكتيرة في الحياة، كانت موجودة في كل مكان ولكن بعد ما رحلت رجاء سابت الكمية دي".

وأكمل عمرو أديب: "رجاء كانت موسوعة، عمرها ما اتخنقت ولا اتقمصت من حد وديما كانت بتحل المشاكل، رغم إن الفنان ديما خلقه ضيق، رجاء اشتغلت معايا في 3 قنوات وهي كانت البركة، وده غير كفاءتها وعظمتها وجمالها، ولكن وجودها جنبي كان بركة ونجاح وسند وفخر".

وأضاف عمرو أديب: "في سبتمبر المقبل ستعود فقرة اسألوا رجاء مرة أخرى للبرنامج، وستستمر الفقرة بصورة رجاء الجداوي علشان يفضل اسم رجاء موجود لفضلها علينا كلنا".