السبت، 24 يوليه 2021 - 04:27 ص

كشف الفنان أحمد آدم، عن تأثره بالنجم الراحل سمير غانم، حيث جمعه به موقف في طفولته، عندما كان يقدم مسرحية موسيكا في الحي الشعبي.

اقرا ايضا .. الفنانة يسرا تكشف علاقتها بدلال عبد العزيز وزوجها الراحل سمير غانم |فيديو

وقال " آدم" خلال لقائه مع الإعلامي رامي رضوان، في برنامج "مساء Dmc" المذاع على قناة DMC ،: "أنا اتأثرت طبعا بناس كتير، بس أنا حبي في كوميديا سمير غانم، أصل أنا شوفت موسيقا في الحي الشعبي دي وأنا طفل عندي 6 سنين، كنت بعمل بروفات في مسرح سيد درويش، وهما كان بيعرضوا في 15 يوم، كنت أول مرة أشوف سمير غانم على المسرح، مكنتش بشوفه غير مع الثلاثي، ويمكن أيامها كنت بحب جورج سيدهم أكتر". 

وتابع: "أنا في موسيقا في الحي الشعبي دي بالذات، كنت بتفرج عليها كل يوم لحد ما حفظتها كلها، جه مرة طفل من الأطفال وهما كانوا 7 أطفال، مجاش من القاهرة، فقالوا عايزين طفل، قالوا شوفوا أحمد آدم، كنت بعمل ساعتها مسرحية أسمها المرجيحة". 
 
وأكمل: "المهم جت الساعة سبعة قالولي انت فين، دول بيدوروا عليك، خفت قولت أحسن يكونوا عايزني أصلا أنا بطلع في البلكون وبتفرج، أحسن يكونوا عرفوا، خدوني للأستاذ جورج سيدهم، قالوا ده بقي كل يوم بيقعد في البلكون وبيتفرج، قالي انت كل يوم بتقعد في البلكون وبتتفرج، قولتله لا مش كل يوم يعني، قولتله اتفرجت كذا مرة، قالي طب انت حافظ أيه من الأدوار، قولتله حافظ دور الأستاذ سمير غانم، لما عرف قالي الله انت جي تعمل دوري كده علي طول".