رحلة السوبر ماركت الشهيرة دي قبل رمضان بتكلف كل بيت الشيء الفلاني، وربما يستلزم الامر سلف أو جمعية وطبعا الهانم تشيل وتحط في عربية السوبر ماركت وبدل عربية واحدة يبقوا اتنين او تلاته واشي بقاله واشي لحمة واشي فراخ، وإذا سألتها حتقدري تخلصي كل ده في رمضان يامدام ؟ تقولك وأيه يعني اللي بيفضل بشيله في أكياس في الفريزر للسنة الجاية طيب واللي حتشتريه السنة الجاية حيروح فين ؟ تقولك حبقي أطلع اللي بايت من السنه اللي فاتت وأوزعه للغلابة أهي حاجة لله ! هو مينفعش نطلع البواقي واللي مخزون من سنه ومش عاوزينه وشاكين صلاحيته انتهت والا لأ ونقول دي صدقة، إذا لم تتصدق وتطعم بما تشتهيه نفسك وبما يماثل طَعَامِك وشرابك فبئس ما تفعل، يا هانم لمي إيدك شوية وأشتري طلباتك أسبوع بأسبوع لحسن اللي بيحصل ده بصراحه حاجة تِفرِس.