الأربعاء، 01 سبتمبر 2021 - 06:33 م

بقلم/ أشرف أمين

مين قال إن الست المصرية زنانة وكمان نكدية، فى الحقيقة أن كل دى أقاويل ليس لها علاقة من قريب أو بعيد بالست المصرية، أو شائعات تم لصقها ليتم تشويه سمعتها، لحساب الاعداء انما الحقيقة عكس كده تماما.

فهى يا سادة مش الست اللى هى كل شوية تديك تعليمات ولا كأنك موظف وهى المدير العام.. تتصل بيك بالتليفون وتقولك وانت نازل متنساش تقفل النور.. حاضر يا حبيبتى، وتشوف كمان الأنبوبة وباب التلاجة مقفولين كويس ولا لا..، ومتنساش باب الشقة تقفله كويس بالمفتاح، استنى والمشترك والفيش فصلتهم ولا لا... كله تمام متقلقيش يا قلبى وعنك بقا التعليمات ديه فى كل مكالمة تكلمهالك وهى فى زيارة عائلية..

لا مش كده وبس وخد عندك ديه كمان من باب اوشاعات كتير تلصق بالستات المصريات، منها يا سيدى قال ايه انك اول متقعد على السفرة فى ساعة غدا عشان تتذوق ما لذ وطاب من الأطعمة اللى طبختها بايديها الحلوين، تحسسك أنها أعظم شيف فى الدنيا.. قصدى لازم تحسسها بكده يعنى.. وتقول كلام من عينة الاكل طعم أو ده احسن طبيخ كلته فى حياتى.. ولكن فى الحقيقة هى بتجرب فيك انواع الأكل المختلفة باعتبارك فأر تجارب، وهى لسه شايفه الوصفة من ساعتين مع الشيف فى التليفزيون.
ومع اول لقمة تلاقيها على طول تقولك.. ايه رايك فى الاكل يا حبيبى.. هوانا لسه دوقت حاجة يا ستى ده كلام فى سرى يعنى.. ولكنك مجبر على الإجابة اللى ملهاش علاقة بالحقيقة ولا المنطق.

تسلم ايدك يا قمر، البامية تجنن.. بس ديه ملوخية يا حبيبى مش بامية.. اه معلش يا قلبى من حلاوة الاكل مش عارف افرق بين الأصناف.. تنظر إلى باستغراب حلاوة الأكل.. حاسه بنبرة تريقة.. انا لا يا حياتى اكلك يجنن من حلاوته.. هعمل ايه واقول ايه حكم القوى على الضعيف وانا راجل مغلوب على أمره ولازم اكون فار تجارب.

كل ديه للاسف خرافات واوشاعات، الغرض منها تشويه الست المصرية الجميلة الرومانسية.. ولازم تعرف أنها احسن واحدة، بتعمل تجارب مطبخية حتى لو انت مش عارف تفرق ما بين البامية والملوخية .