الأربعاء، 08 سبتمبر 2021 - 07:23 م

الدنيا حر والجو نار واذا بزوجتى العزيزة مرة واحدة وبدون مقدمات «حبيبى عايزة اصيف فى الساحل»، ساحل ؟! ساحل ايه؟! دا احنا ماشيين بالزق وبنكمل لاخر الشهر بدعا الوالدين، فكرت لثوانى ورديت بكل هدوء فى محاولة لاقناعها .. ساحل ايه يا حبيبتى انا مش عاجبنى الحفلات والسهر هناك وكمان الاسعار غالية، وطبعا زوجتى كأى زوجة مصرية اصيلة كان ردها انت مش عايز تفرحنا ولا تخرجنا طب لو مش عشان خاطرى يبقى عشان خاطر اولادك.
٣ ثوانى وابتدى الشد والجذب قصدى الحوار اللطيف بينى وبين حبيبة قلبى، قالتلى خلاص نروح شرم او الغردقة وامرنا لله، فضلت افكر ورديت خلاص نروح ٣ ايام لان قرار السيد رئيس مجلس الادارة حضور ٤ ايام فى الاسبوع بسبب كورونا، فكرت للحظات وردت خلاص انا موافقة ابتدى شوف هتحجزلنا فين ؟! طبعا انا هنا دخلت المصيدة وخلاص المسار اجبارى .
رجعت تانى وقلتلها يا حبيبتى احنا عندنا كنز فى دمياط اسمه راس البر دا مصيف المشاهير زمان، بحر ونهر وجو هادى واحلى اسماك وحلويات، ايه رايك قالتلى بكل هدوء انسى مبحبش راس البر خلينا فى شرم او الغردقة، ومع النقاش ده أبديت اسلم نمر ووافق ومصطفى بدأ يقولى «البسين يا بابا».
سلمت أمرى لله ودعيت اللهم انى لا اسالك رد القضاء ولكنى اسالك اللطف فيه، وبدات اعمل كام مكالمة عشان احجز، واذا فجأة لقيت اتصال من شريف الزهيرى بصوته الملائكى يغرد كالكروان قال لى السيد رئيس التحرير قرر عودة الجميع الى العمل قلتله ينصر دينه ا. خالد، لازم كلنا نعمل من اجل جريدتنا الموقرة، خلصت المكالمة وقلتلها يرضيكى يتخصلمى او اقصر فى شغلى.
و من ساعتها وهيا ساكتة تفتكروا ليه ؟! اكيد بتحضر لمفاجاة، فربنا يحمينا ويحفظنا وادعولى ربنا يدينى طولة العمر واكتب تانى!