هقولك زي ما الناس بتقول يا ريس.. إحنا عارفين إنك ما بتخافش لأنك الراجل الجدع اللي شال كفنه علي إيده يوم 3 يوليو ٢٠١٣، وتحدي العالم علشان ينقذ بلده.. واللي يضحي بكل حاجة ويُعّرض نفسه لأكبر المخاطر علشان خاطر مصر يبقي ما بيخافش.. لكننا عارفين كمان انك بتخاف ربنا واللي يخاف ربنا ما يخافش ابدا.. بس انت كمان يا ريس لازم تعرف احنا ما بنخافش.. ليه؟!.. علشان احنا كنّا دولة تحت الأسر وكان في عصابة اسمها الاخوان.. عصابة دولية مدعومة من كل دول الشر اللي مش بتحب مصر استولت علي البلد واللي فيها.. وكنا بندعي ربنا انه يخلصنا منها ويرزقنا باللي ينجينا..ولما انت ظهرت شعرنا ان الفرج علي إيدك.. والله العظيم ده كلام بجد واللي بيقوله كل المصريين الشرفاء..ولما نزلنا يوم 30 يونيو كانت هتقوم حرب اهلية لأننا شعرنا باليأس وانعدام الأمل لحد لما الجيش المصري العظيم اللي انت كنت وزير دفاعه استجاب لنداء الشعب..ولما طلبت مننا ننزل يوم 27 علشان نفوضك علشان تحارب الارهاب نزلنا وكنا حاسين ان العالم كله ضدك.. خدنا ولادنا معانا رغم ان البلد كانت من غير امن تقريبا بس ما خفناش علشان انت قلت لنا ما تخافوش وأكدنا للعالم ان الراجل اللي ضحي بكل حاجة علشان خاطر مصر..المصريين معاه وعندهم استعداد يضحوا بكل حاجة علشان خاطر بلدهم..عارف يا ريس لما بنقعد نفتكر احنا كنّا فين وبقينا فين بنحس ان ربنا كرمنا كرم كبير اوي..احنا عارفين انك راجل وطني ومخلص ونفسك تشوف مصر قد الدنيا ونفسك الناس كلها تشتغل وتحب بعض بجد وتحمد ربنا علي اللي احنا فيه..عارفين كمان انك اشتغلت في سنتين شغل 20 سنة وعارفين انك رجعّت صورة مصر العظيمة امام العالم..كنّا فرحانين وانت بتقابل الضيوف الملوك والرؤساء في قصر عابدين وقصر القبة..حسستنا بقيمة وحجم بلدنا اللي كانت منهوبة ومسروقة..اوعي تصدق ان شعبيتك بتقل..لا والله خالص..دول بس المنتفعين اللي عاوزين يوصلولك بأي طريقة ومش لاقيين سكة بيصدرو الكلام ده..خلي بالك ياريس احنا شعب ذكي وبنفهم مين عاوز ايه..طب أقولك علي حاجة..الناس بتسأل من دلوقتي وبتقول يا تري هنلاقي راجل وطني تاني زي السيسي بعد 6سنين..احنا ما بنخافش يا ريس علشان معانا راجل نزلنا في الشوارع وطلبنا منه يبقي رئيس ولما جه ما ضحكش علينا..لا ده عمل اكتر ما وعد بكتير..كمان يا ريس الناس بتقول ان اللي حوليك مش بيشتغلوا زيك او من الاخر كده انهم شلة منتفعين..بس انا هقول لحضرتك حاجة.. لو كانوا منتفعين وكل اللي بيحصل في البلد ده من مشاريع عملاقة وتنمية واستعادة استقرار وخلافه والنبي تحافظ عليهم.. اصل أهل الثقة عاوزين يتصدروا المشهد بس مش عارفين ومش لاقيين حاجة يقولوها فيك.. فلازم يطلعوا حاجه مش تمام فيتكلموا علي اللي معاك..يا ريس وانت بتفتتح مشروع قناة السويس الجديدة حسينا ان مصر رجعت..وانت بتفتتح مشروع الفرافرة علشان نجني القمح شعرنا ان الخير بدأ يهل علينا بجد..اوعي تفتكر ان احنا مش علي قلب رجل واحد.. لا خالص.. الناس الوطنيين بجد متماسكين جدا..وأهل الشر لسه عندهم أمل ان احنا نقع في بعض وده عمره ما هيحصل، علشان احنا ربنا كرمنا براجل عارف ان في حساب في الاخرة..الكلام ده من مواطن مصري لرئيس مصر اللي الشعب عارف قيمته بجد..خلي بالك ياريس اللي زي حلاتي لما يكتب الكلام ده عمره ما هيبقي عاوز منك حاجه، الا انك تكمل المشوار بنجاح علشان انا عارف ومتأكد ان اللي انت بتعمله ده لا هو ليا ولا ليك.. ده للجيل الجديد اللي نفسنا يطلع ما يشوفش التعب والمعاناة اللي احنا عشناها..طول ما انت بتخاف ربنا ما تخافش ابدا.. وطول ما احنا بنعامل ربنا في كل حاجة مش هنخاف ابدا..عاوز أقولك ان الشعب فرحان اوي بمحصول القمح وفرحان لما بيمشي علي الطرق الجديدة.. وعاوز أقولك كمان ان لما بتيجي سيرتك عند الناس الطيبين اول كلمة بتتقال ربنا يحميه ويستره زي ما ستر مصر واهلها.. احنا ياريس عارفين انت ما بتخافش ليه.. بس يارب يكون كمان وصلك احنا ما بنخافش ليه.. وتحيا مصر.