السبت، 11 سبتمبر 2021 - 07:05 م

جلس الاستاذ كاظم ، وبجواره زوجته الدكتورة لواحظ ، فى شرفة منزلهما يتناولا الشاى ، بعد تناول وجبة الغداء ، عقب صلاة الجمعة ، وعلى مقربة منهما جلس الابن طأطأ ، يلعب بالتليفون المحمول .
الاب كاظم : بتعمل ايه يا طأطأ
الابن طأطأ : بتصفح السوشيال ميديا يا بابا
كاظم : بلاش يا طأطأ ، السوشيال ميديا كلها مشاكل ، وبتتسبب فى جرائم كتير
طأطأ : يا بابا انا باختار الصفحات الموثوق فيها
كاظم : ولو ، جرائم كتير منتشرة على صفحات متعددة ، ابعد عن الموضوع ده احسن 
طأطأ : يا بابا متقلقش ، اى جريمة على الصفحات دى بتتمسك ، وبيتحاسب الجناة
كاظم : إزاى بقى يا فالح
طأطأ : يا بابا انت ماسمعتش عن الجرائم الى تم حل أسرارها وبسرعة
كاظم : يا طأطأ !!!
طأطأ : يا بابا صدقنى فاكر لما جددتلك رخصة العربية ، وجتلك على البيت فى يومين ، من غير متتحرك من البيت ، كله من على النت
كاظم : ايوه دى خدمات الكترونية ، لمنع التكدس ، علشان كورونا
طأطأ : يا بابا ... شرطة بلدنا مسيطرة على كل الامور الى بتهم الامن والامان لكل الناس ، انت مشفتش قبضوا على المجرمين اللى خطفوا الواد بتاع الغربية بسرعة إزاى .
كاظم : ده علشان تتبعوا كاميرات المراقبة فى الشوارع
طأطأ : يا بابا ... لولا التقدم اللى وصلت له الشرطة ما كان التفكير فى تركيب الكاميرات ، وعلى فكرة فى رجالة فى الشرطة بيتابعوا مواقع الشوشيال ميديا ، ليل ، نهار ، وأى جريمة بيحلوا ألغازها بسرعة كبيره جداً جداً ، والامثلة كتير اوى اوى .
كاظم : طب عاوز اشوف يا فالح افندى
طأطأ : ثوانى يا بابا « حيث فتح طأطأ صفحات بعض الصحف ، والمواقع الاخبارية « .. بص يا بابا ، شوف الصفحات دى ، شوف جرائم اد ايه تم فك شفرتها ، باستخدام احدث الوسائل التكنولوجية
كاظم : ايه ده كله يا طأطأ
طأطأ : يا بابا الشرطة فى مصر ، مدربة ، وفيها احدث وسائل التكنولوجيا المستخدمة لكشف الجرائم فى كل المجالات ، وفى تعاون بين كل قطاعات الشرطة ، لكشف اى جريمة تظهر على الشوشيال ميديا 
كاظم : انت بتعرف كل ده إزاى يا واد يا طأطأ
طأطأ : يا بابا انا كبرت ، وبقيت فى اولى ثانوى ، ولازم تثق فى معلوماتى ،
واختتم طأطأ  كلامه بسؤال للأب كاظم : عملتلى ايه يا بابا فى التقديم الورقى لمدرسة السعيدية