فور أن وصلت الولايات المتحدة الأمريكية فوجئت بمكالمة من أمي في البلد:
- حمد لله علي سلامتك يا ولدي.
- الله يسلمك يا امي طمنيني عليكي وعلي ابويا.
- احنا بخير والحمد لله بس دايخين علي ورقة مش لاقيينها وعلشان كده طلبتك يمكن تعرف تلاقيهالنا عندك!
- ورقة إيه دي يا امي إللي مش لاقياها في البلد وعايزاني اشوفهالك هنا في أمريكا؟
- قسيمة جوازنا أنا وأبوك!.
- هههههه الله يحظك يا مه طبعا بتهزري.
- تفتكر يعني اتصل بيك في أمريكا علشان اهزر معاك؟
- ما هو يا مه بصراحة كلامك مش معقول، لو مش لاقيين القسيمة بتاعتكم في مصر عايزاني ألاقيهالكم في أمريكا؟
- أيوه يا ولدي مش بيقولوا فيه أبصر كام مليون وثيقة اتسربت في بنما اليومين إللي فاتوا؟
- يا مه الله يكرمك إيه دخل أمريكا بوثائق بنما ثم يعني تفتكري وثيقة جوازك انتي وابويا كانت في بنما بتعمل إيه؟
- أولا عيب تبقي صحفي ومش عارف إن أمريكا ورا كل إللي بيحصل في العالم ثم إن أكيد يعني طالما لقيوا كل الوثائق والأوراق القديمة دي إللي في بنما مش حيكون صعب عليهم يلاقوا القسيمة!
- يامه قسيمة إيه بس قولي كلام غير ده!
- هو انت حاتخسر حاجة لو سألت عندك؟
- طب يعني لو كان كلامك صح عايزاني اسأل مين بس يامه تفتكري يعني؟
- مفيش غيره قريبنا إللي عندك.
- غريبة يعني عمرك يامه ماجيبتيلي سيرة حد قريبنا عايش في أمريكا، يطلع مين يامه ده؟.
- باراك حسين أوباما.
- هههههه ضحكتيني يامه، عايزاني أروح اسأل رئيس أمريكا بذات نفسه لو كانوا لقيوا قسيمة جوازك من ابويا في وثائق بنما ولا لأ؟
- أيوه وأهو بالمرة تسأله عن إللي بيحصل في الدولار ده. ألا قولي صحيح هو الدولار عندك في أمريكا بكام؟
- الدولار هنا بدولار يامه.
- ولما هو عندك في أمريكا يساوي دولار واحد أومال ماله شايف نفسه وبيتشطر علي الجنيه بتاعنا؟
- يامه دي حكاية طويلة ليها علاقة بحاجات كتير وكل ما كان الاقتصاد كويس وبخير كل ما قيمة العملة بتاعة البلد كويسة وحالة الدولار هنا بتأثر في أسعار الحاجات في العالم كله.
- متكلمنيش بالنحوي يا ولدي وبلاش فذلكة فيها إيه يعني لو تخلي أوباما يطبع شوية دولارات كتير ويوزعهم علي العالم كله ويتوصي شوية بمصر، قوله وحياة جدك حسين ماتكسفنا.
- ههههههه يامه إنتي فاكراني هنا باتغدي كل يوم مع أوباما؟
- وهم يعني إللي بيتغدوا معاه أحسن منك ولا أحسن منك؟
- الله يجبر بخاطرك يامه بس عايز أقولك أوباما دلوقتي أساسا خلاص بيلملم أوراقه وهدومه علشان قرب يمشي من البيت الأبيض.
- يمشي يروح فين يا ولدي هم الأمريكان عاملين ثورة علي الراجل عندك ولا إيه؟
- هههههههه لا يامه مفيش ثورة ولا حاجة.
- غريبة طب أومال إيه إللي يمشيه طالما مفيش ثورة؟
- يامه الرؤساء هنا بيقضوا مدتهم ويمشوا من نفسهم يعني من غير ثورة ولا يحزنون يعني كلها كام شهر والراجل يقعد في بيتهم.
- طيب طالما حايكون فاضي أهو ما تكلمه بقي يتسلي كده ويفرز وثائق بنما يمكن يلاقيلنا القسيمة!
- كلمته يامه خلاص.
- هاه وقالك إيه؟
- قالي قول لابوك يطلقها ويعقد عليها من جديد!