البلد دي عاوزه اللي يتكلم في حاجة يبقي فاهم واللي مش فاهم يقعد يسمع.. خلوا بالكم..الجهل اخطر من الإرهاب الف مرة

إلي كل مذيع وجد نفسه فجأة يجلس امام كاميرا في محطة فضائية مشبوهة ليتكلم فيما يفهم وفيما لايفهم ويخرج علي الناس بأفكار مغلوطة ويستند علي الصوت العالي وقلة الأدب والتطاول.. أقول.. حاول تفهم يا غبي.. ليس من حقك ان تصدر الأحكام او تطلق الأفكار المغلوطة لتضليل وتسخين الرأي العام لمجرد انك جاهل ولا تعرف حقيقة الموضوعات التي تتحدث عنها.. أوجه هذا الكلام لبعض الاعلاميين اصحاب القلوب والضمائر السوداء والذين لا يعرفون شيئا عن حقيقة الجزر السعودية..تيران وصنافير.. ولا يعرفون معني الوطنية..وخرجوا علينا وكأنهم اساتذة وخبراء في التحكيم الدولي وشئون المياه والحدود وغيرها.. هذه هي كارثة الاعلام الحقيقية في مصر.. قلنا منذ فترة ان الجهلاء يعتلون المشهد. وان اصحاب المصالح يستخدمون بعض الاعلاميين الجهلاء كأدوات ضغط لتحقيق مصالحهم الشخصية..ولكن اتفاقية توفيق الحدود المصرية السعودية. كشفت الجميع وخرج علينا مناضل الفضائيات بتصريحات رنانة يبشرنا بالثورات لان مصر تبيع أراضيها وخرج علينا مذيع اعوذ بالله من غلاسة....... حاجة كدة ما تتوصفش وفضل يوجه كلام للرئيس السيسي وعاوز يعلم جيش وشعب مصر معني الوطنية ويتكلم عن الارض والعرض.. (النبي تتنيل علي عينك ياجاهل يا اهبل يا غلس واكيد طبعا انت عارف نفسك).. البلد دي عاوزه اللي يتكلم في حاجة يبقي فاهم واللي مش فاهم يقعد يسمع مش عيب بس العيب اننا نكون خبراء في كل شئ وفي الاخر نكتشف ان احنا مش فاهمين اي حاجة.
>> الي كل مسئول تولي منصب في الدولة بالصدفة او بالواسطة او باي حاجة.. ليس من حقك عندما تتولي منصبا مهما كان حجمه ان تنسف البيت بالكامل وتطيح بكل من عمل مع المسئول الذي شغل المنصب من قبلك.. البلد دي مش عزبة حد دي دولة مؤسسات..وحضرتك او حضرتك هنا علشان خدمة مصر وشعبها مش علشان نحول المؤسسات لعزب..اللي عاوز يشتغل بيفكر في الاول يستفيد من كل الكوادر الموجودة وبعدين يبدأ يدور علي النواقص ويكلمها مش كل ما يشوف حد في وشه يقوله اسمك ايه.. يقوله فلان..يقوله كويس اوي.. انت مش معانا..والله الدول لا تدار ابدا بهذه الطريقة حاول تفهم يا مسئول.
>> الي كل مسئول سمح بأن تكون مناهج التربية والتعليم للحفظ فقط أقول ان أبناء مصر هم المستقبل الحقيقي وان تقدم الدولة مرتبط ارتباط وثيق بعلم وجهل شعبها.. واحنا الشهادة لله بنفنن في تعقيد ولادنا من العلم لدرجة ان الجيل الجديد اصبح يجلس علي مواقع التواصل الاجتماعي أضعاف ما يجلس لمتابعة دروسه المقرره في المناهج التعليمية.. وبيني وبينكم عندهم حق..مال تلميذ الابتدائي بالي بيحصل في بلاد (الواق واق).. طب نعلمه الاول تاريخ بلده وبعدين ندخل علي الدول المجاورة..ياريت نشوف حد ابن حلال ويكون عنده مخ وفكر يقدر يعيد النظر في المنظومة التعليمية من جديد..خلوا بالكم..الجهل اخطر من الإرهاب الف مرة.
>> السادة المسئولون عن توصيل الغاز لبعض المناطق يالقاهرة الجديدة..لو كُنتُم تقدمون خدمة مدفوعة الأجر وباسعار مرتفعة جدا فهذا من حقكم لأنكم اصحاب الغاز.. ولكن ليس من حقكم ان تقوموا بتكسير الشوارع وتركها دون اعادة إصلاحها لسببين.. الاول وهو ان الشعب يدفع ثمن هذه الطرق وليس من حقكم تخريب ممتلكات الشعب..والثاني عقودكم مع الأحياء تلزمكم بإعادة اصلاح الطرق فور الانتهاء من المشروعات وهذا لم يحدث..لو كُنتُم تتعمدون إلحاق الضرر ابالمواطنين فهذه جريمة..ولو كُنتُم تعرفون أنكم ملتزمون بالإصلاح وتتقاعسون فهذا فساد..حاولوا تفهموا ان الشعب بقي عارف حقوقه وممكن اي مواطن يرفع عليكم قضية بكرة وساعتها هتجروا تصرخوا وتقدموا الاعتذارات.. وتحيا مصر.