داليا جمال
داليا جمال


أما قبل

وأنا ذنبى إيه؟

داليا جمال

الجمعة، 24 سبتمبر 2021 - 05:52 م

 

كل يوم بيزيد عدد الشركات والمواقع التى تبيع لنا السلع والخدمات عبر الإنترنت.. وبسبب فيروس كورونا بقينا كلنا بنشترى أون لاين.
 وطبعا طالما المسألة فيها فلوس وبيع وشرا فالموضوع مستحيل يفوت على الدكتور معيط وزير المالية مرور الكرام.
ولذا فقد اصدر القرار رقم ٣٤٥ الذى يلزم كل من يعلن عن سلعة او خدمة عبر الانترنت بتسجيل نشاطه بمصلحة الضرائب، وكتابة رقم تسجيله الضريبى الموحد على إعلاناته، وأى اعلان لبيع السلع اونلاين ليس به رقم التسجيل الضريبى عقوبته السجن من ٣ إلى ٥ سنوات بتهمة التهرب الضريبى المخلة بالشرف..  لحد كده والموضوع جميل جدا. لأنه أصبح يوجد جهة يمكن الرجوع إليها فى حالة وقوع نصب أو غش من الشركة، ولكن الكارثة أن القانون أعفى الشركات التى يقل حجم مبيعاتها عن ٥٠٠ ألف جنيه من التسجيل الضريبى!!
وهى الكيانات التى يكثر فيها تعرض المشترى للغش والنصب، فالبراندات الكبرى تحافظ دائما على اسمها وسمعتها.. فلماذا لا يكون التسجيل للجميع، على أن تتولى مأموريات الضرائب إعفاء من لم يصل لحجم المبيعات الخاضع للضريبة؟
وكيف نترك تقدير حجم المبيعات لصاحب النشاط.. اللى بالتأكيد هيفضل يحسبها ويفاصل ويشوف المليون جنيه كأنها عشرة جنيه ويشوف ان المسافه بينه وبين ال ٥٠٠ ألف كالمسافة بين المشرق والمغرب !
اما أغرب ما سمعته عن تطبيق هذا القانون هو أن المشترى عن طريق الاون لاين عليه التأكد بأن الممول مسجل ضريبيا وأن الاعلان مكتوب فيه رقم التسجيل الضريبى!!
واذا تعامل مع إعلان بدون رقم تسجيل ضريبى يعتبر شريكا فى جريمة التهرب الضريبى مع الممول ! يعنى ممكن تلبس قضية علشان اشتريت كيس مشابك ولا حبل غسيل! ولو ابنك زن عليك تشترى له ساندوتش شاورمة دليفرى.. لازم تتأكد إن بتاع الشاورمة كاتب تسجيل ضريبى.. او تنزل تسأله بنفسك لو مش كاتب ! بس خلى بالك من السكينة بتاعة الشاورمة حامية وطويلة.. يعنى هاتجيبك هاتجيبك. وماترجعش تقول أنا ذنبى إيه؟
ذنبك إنك فكرت تشترى من على النت !
 

الكلمات الدالة

مشاركه الخبر :

 
 
 
 
 
 
 
 
 

 
 
 

 
 
 

مشاركة