الإثنين، 27 سبتمبر 2021 - 01:15 ص

تحدث سيد معوض المدرب المساعد السابق لمنتخب مصر عن تأخر حضور مصطفى محمد لمعسكر منتخب مصر الأخير.

وقال سيد معوض خلال استضافته في برنامج الماتش الذي يقدمه الإعلامي هاني حتحوت عبر شاشة صدى البلد "المعسكر ده له ظروف خاصة، بعد ما بعتنا اسامي المحترفين كان في 2 لعيبة كوكا ومصطفى محمد عندهم عروض من اندية تانية".

وتابع "مصطفى محمد كان وضعه أصعب شوية من كوكا علشان القيد في فرنسا هيقفل بدري عن تركيا.. كوكا قال انه هيتأخر علشان العروض، لكن مصطفى محمد مقالش، غاب يوم والتاني واكتشفنا انه في فرنسا بيعمل الكشف الطبي وبكدة هو تأكد غيابه عن المباراة الأولى".

وأضاف "مصطفى وصل يوم المباراة، لو أنا كجهاز فني عاوز اخلص عليك هطلع اتكلم وأخرجك من المعسكر، ده ماتش كأس عالم، لو عاوز اخلص كان سهل، ده قميص منتخب مصر وحلم لأي حد وشرف لأي حد يكون موجود".

وواصل معوض "مصطفى اتمرن تاني يوم الصبح، رحنا الجابون لعب معانا، الي حصل بعد الجول السؤال هو عمله ليه؟".

وأكد "الجهاز الفني عمل جميل معاك ومتمش استبعادك والأمور عدت، مفيش حاجة في المنتخب اسمها حجز اماكن، هو ومحمد شريف بتتنافسوا على المركز وهو كان بقاله 4 او 5 ايام مش بتتمرن ومحمد شريف بيسجل مع المنتخب، انت عاوز تيجي متاخر وتيجي تلعب أساسي كمان؟".

واختتم سيد معوض تصريحاته "كوكا الي اتأخر يوم وجه متكلمش ومفيش صوت، ممكن تبقى عايش في دور انا عديت المرحلة دي، لكن تشوف واحد من افضل 3 لعيبة في العالم وهو محمد صلاح مش بتسمع صوته سواء قبل ما يكون الكابتن او بعدها".