الأربعاء، 29 سبتمبر 2021 - 06:28 م

- فيه إيه فى الجرنان شاغلك أوى كده ياسى السيد؟
- اسكتى يا أمينة ، بايدن ضرب ماكرون قلم على قفاه إنما إيه حايطلع من نافوخه.
- استنى الأول فكرتنى أما أقوم أحط المكرونة على النار تتسلق، إنما يطلع مين «بايضن» ده ياخويا ولا سى ماكرونة ده؟
- ههههههههه الله يحظك يا أمينة، بايدن ده رئيس أمريكا وماكرون رئيس فرنسا.
- طب ومش عيب لما رئيس أمريكا ورئيس فرنسا سايبين مصالحهم وقاعدين يلعبوا صلح؟
- صلح إيه يا أمينة هو أنا قولت كده؟
- مش ياخويا أنت اللى لسه قايل أبصر مش عارف مين فيهم لسع التانى قلم على قفاه؟

- تصدقى يا أمينة، لولا أنه عيب فى العمر ده، أنا كنت دلوقتى ضربتك قلمين على قفاكى.. يا ولية قلم هنا يعنى ضربة سياسة وإقتصاد ولعب على كبير.
- طب ماتفهمنى يابو العريف بدل ما أنت عمال تقطم فيا كده، ولا يعنى بتعايرنى أكمنك بتعرف تفك الخط وأنا لا؟
- بيقولك ياستى فرنسا كل سنة بتلهفلها ييجى كده 66 مليار دولار من أستراليا تبيعلها بيها غواصات.
- ويطلعوا كام الستة وستين «مريار» دول يعنى أكتر من عشر تلاف جنيه مثلا؟
- يا ولية اخرسى أحسن واسمعى وأنتى ساكتة وإلا والله أسيبك وأروح أكمل قراية الجرنان عند جليلة ولا زبيدة.
- خلاص ياخويا سكت أهو.. أحب على يدك يا سى السيد ماتزعلش نفسك.

- المهم بيقولك فجأة بايدن قال لنفسه يعنى هى استراليا تشترى غواصات من فرنسا وسايبة بضاعتنا احنا ليه؟..ألا بالمناسبة صحيح هو أنتى يا أمينة عارفة يعنى إيه غواصات؟
- طبعا يا سى السيد مش دى العوامات اللى كنا بنشتريها للعيال على البحر لما كنا يعنى زمان بنروح نصيف فى راس البر؟
- أيوه فعلاً هى بغباوتها يا أمينة!
- عشان تعرف بس أنك مش أنت لوحدك اللى متسئف ياخويا ، المهم كملى ليه بيتخاقوا على شوية عوامات مش فاهمة، ماييجوا عند الراجل اللى على ناصية خالد بن الوليد فى سيدى بشر ويشتروا كل العوامات اللى نفسهم فيها؟

- سيدك بشر إيه وعوامات ومايوهات إيه بس.. يا أمينة إفهمى الموضوع أكبر من كده والدنيا والعة وماكرون عمال يعيط ، ويقول إن أمريكا غدرت بيه وطعنته فى ضهره، والإتحاد الأوروبى بذات نفسه بيقول لأمريكا مكانش العشم ومايصحش الحلفاء يعملوا فى بعض كده, وفرنسا سحبت السفيرين بتوعها اللى فى واشنطن واللى فى كانبيرا.
- فكرتنى أما اقوم أحط كسبره على المكرونة.
- تصدقى أنا غلطان اللى بحاول أفهمك اللى بيحصل فى العالم.
- يا خويا حاتفرق معانا إيه, سيبك بقى من السياسة وقرفها قولى يا سى السيد يكونوش ياخويا كاتبين عندك فى الجرنان إذا كانوا جابوا حد يدرب المنتخب بدل حسام البدرى ولا لسه؟
- هههههههه والموضوع ده شاغلك أوى ليه تكونيش بتفكرى تدربى المنتخب؟
- بصراحة لا لكن قلت فى نفسى يا سلام لو ياخدوا سى السيد يدرب المنتخب خلينا نشوفلنا يومين ونقب على وش الدنيا،هم حيلاقوا أحسن منك؟
- بس أنا مليش فى الكورة!

- وهم يعنى المدربين اللى بيجيبوهم لهم فيها؟
- لا خلاص بقى اتهدى جابوا واحد أجنبى اسمه كيروش.
- طب ما أنت أولى يا سى السيد!
- يا ولية بقولك خلاص جابو كيروش!
- لو هى حكاية كروش فأنت برضه عندك كروش ياخويا ولا يعنى لازم عقدة الخواجة ده حتى الكروش البلدى تكسب !
- طالما وصلت لكده يبقى عن أذنك يا ست أمينة؟
- على فين يا سى السيد ؟
- أروح الجيم انزل الكيروش وأرجعلك ! .