الأربعاء، 29 سبتمبر 2021 - 07:02 م

نخش فى الموضوع على طول، من خمس سنين كدة قررت انى اتجوز، وطالما انت داخل تجربة جديدة فلازم تسأل مجرب ومحنك، قعدت افكر يا ترى مين انسب شخصية تتعلم منها، المهم لقيت صديقى الصدوق اللى انا مش هذكر اسمه، قعدنا مع بعض قلتله ها يا معلم هنعمل ايه؟، رد بكل ثقة خليك أسد زى اخوك مفيش حاجة اسمها انت فين؟ ولا بتعمل ايه؟ ولا هتيجى امته عايزك تسيطر من البداية، .. ٣ دقايق رن تليفونه لقيته بيقول بصوت واطى يا باشا انا فى الشغل وهتحرك بعد نص ساعة وهجيب اللحمة وهعدى على السوبر ماركت ومش هتأخر!، بدات اضحك قلتله ايه يا أسد قالى عشان هى تعبانة بس النهاردة .

سالته ايه تانى؟ رد مفيش حاجة اسمها انا رايحة عند ماما وبابا، ولازم تطبخ وتسيبك من التيك اوى كفاية بقا اكل مطاعم انت بتتجوز عشان تستقر، بعد يومين كلمته انت فين؟ رد انا مع المدام عند نساييى وهكلمك بعدين!، قلتله خد يا بنى انت بتهرج انت كل حاجة بتقولها بتعمل عكسها، قالى انا مش فاضى انا رايح اجيب اكل ديلفرى للبيت.
عدت الايام وجمعنا اول لقاء اسرى، اول كلمتين قالهم للمدام، والله يا باشا قلتله المدام تروح عند مامتها وباباها كل اسبوع، ولازم تخف الضغط عليها تاكلوا ديلفرى يعنى هيا هتربى العيال ولا هتطبخ، وتنسى بقا لمة صحابك الواحد ملوش غير بيته .

الخلاصة صديقى الصدوق بعد حوارات كتير قالى خدهم على قد عقلهم، دول مجانين، ومن خاف سلم،، وقول كلمتين حلوين ونام فى امان، وكلمة حاضر وطيب بتريح، وده ميمنعش برضه انها تصحيك الساعة ٣ بليل واقولك فاكر لما كشرت فى وش صاحبتى فى الخطوبة قولى انت عملت كدة ليه؟!