لو مش لاقيين حاجة تقولوها خليكوا في بيوتكم ومحدش هيسأل عليكم والله.. كده كفاية أوي.. البلد مش هيستحمل حجم الهيافة والإسفاف وقلة الأدب

مش هروح بعيد.. خلّونا نسترجع مع بعض ملخص أسبوع واحد من حياة المصريين.. الرئيس السيسي في جولة آسيوية هي الأهم والأقوي من وجهة نظري منذ تولي مقاليد الحكم.. الرجل زار كازاخستان أحد أهم دول الاتحاد السوفيتي السابق.. دولة تتميز بالتكنولوجيا والوفرة في إنتاج القمح وأحد أهم بوابات عودة السياحة الروسية إلي مصر.. وبعدها زار اليابان صاحبة ثالث أقوي اقتصاد علي مستوي العالم وصاحبة تجربة تعليمية هي الأفضل عالميا بخلاف قوتها الصناعية وحجم ثقلها في المحافل الدولية.. واختتم زيارته بكوريا الجنوبية أحد أهم الاقتصاديات الصاعدة في العالم.. نتائج الجولة كانت مبهرة واستطاع خلالها الرئيس أن يشارك في توقيع عدد كبير من الاتفاقيات الاستثمارية والاقتصادية والتعليمية بخلاف فرص التدريب للمصريين علي أحدث وسائل التكنولوجيا في مختلف المجالات بجانب بعض المنح والقروض التي قد تساعدنا علي تحسين أحوالنا المعيشية.. ما لفت نظري في الجولة هو استقبال رئيس مصر بهذا المستوي الراقي والمتحضر من قادة الدول الثلاثة ومدي احترامهم لقيمة وحضارة مصر وشعبها ورئيسها.. وفي نفس الأسبوع احتلت القضايا الهايفة كالعادة عناوين بعض الصحف ومعظم برامج التوك شو.. نقول مع بعض.. جزمة النائب كمال أحمد علي رأس النائب توفيق عكاشة.. معركة التراشق بالألفاظ بين رئيس نادي الزمالك والمدرب السابق.. وصلة الردح بين عمرو أديب وخالد صلاح وتوفيق عكاشة.. حبس ريهام سعيد وحبس مني العراقي وخناقة الممثلة ميرهان حسين مع ضباط الشرطة..واعتزال الفنانة شيرين.. هو ده الإعلام المصري.. نخلص من قضية السبكي تطلع قضية عكاشة والسفير الإسرائيلي.. نخلص من الاتنين تطلع لينا قضية الفنانة إللي كانت بتدير شبكة دعارة.. هو في إيه بالضبط.. لو مش لاقيين حاجة تقولوها خليكوا في بيوتكم ومحدش هيسأل عليكم والله.. كده كفاية أوي.. البلد مش هيستحمل حجم الهيافة والإسفاف وقلة الأدب اللي احنا عايشين فيها بسبب برامج التوك شو الفاشلة.. يعني بالذمة بدل ما نركز علي زيارة رئيس مصر ونبدأ نفكر بجدية إزاي نشغل الناس علشان نحقق استراتيجية 2030 ندور علي أهيف الموضوعات ونركز عليها ونلهي الناس.. عاوز أعرف أنهي برنامج أطلق حملة وطنية وتابعها للتخلص من البطالة أو البلطجة أو تنظيف الشوارع أو محاربة البناء علي أراضي الدولة أو بلطجة التوك توك والميكروباصات.. كل هذه القضايا بتهم البلد وبتشغل الشارع المصري.. إحنا مالنا فلانة قليلة أدب ولاّ مؤدبة.. تكتشف كده وأنت قاعد تتفرج علي أي برنامج من بتوع إعلام البامية إن إحنا دولة - الشهادة لله - بتعرف تفضح نفسها وبتقدم للأعداء خدمات علي طبق من دهب.. لا بنشتغل ولا بنفكر ولا عاجبنا حاجة.. طول النهار والليل نتكلم علي بعض ونجيب سيرة فلان وعلان وكل واحد فاكر ان هو الجهبذ وإن ما حدش يعرف يعمل اللي بيعمله وتكتشف في الآخر إنه اكذوبة وكل اللي بعرفه انه بيعرف يتاجر بالكلام علي حساب البلد والشعب الغلبان.. ما تيجو نفكر نتكلم في المهم وبس.. وكل واحد يخليه في حاله ونسيب الخلق للخالق ونفكر نحول تضييع الوقت من كلام علي الناس إلي عمل حقيقي ونتفاعل بجد مع مشاكل بلدنا.. ما أهو احنا بقلنا سنين كتير بنتكلم وكل يوم من سيئ لأسوأ.. تعالوا نغير البوصلة يمكن ربنا يرضي علينا ويهدينا ويتصلح حالنا كلنا.. والله مفيش بلد بتعيش بالفكر ده وبتتقدم خطوة واحدة.. للمرة المليون البلد دي لو ضاعت مش هنعرف نرجعها تاني وكلنا هنبقي شاركنا في سقوطها.. يارب نفهم.. وشكرا للراجل المحترم عبد الفتاح السيسي اللي تقريبا هو اللي بيشتغل لوحده علشان يوفر الحياة للمصريين.. وشكرا لأبطال الجيش والشرطة الشرفاء اللي بيستشهد منهم كل يوم بطل علي يد الإرهابيين علشان انا وانت نعيش في أمان.. هما هدفهم يحافظوا علي مصر ويضحوا بروحهم بجد.. لكن بتوع التوك شو ولا مؤاخذة.. هدفهم تقطيع مصر علشان يكسبوا فلوس كتير وبس.. وتحيا مصر.