بسمة وهبة
بسمة وهبة


بسمة وهبة: مصلحة مصر في كل مجال أولاً.. وأي حاجة تانية تيجي بعدها

مصطفى أحمد

الإثنين، 11 أكتوبر 2021 - 09:03 م

 

ظهرت الإعلامية بسمة وهبة، خلال برنامجها "90 دقيقة" المذاع على شاشة "المحور"، بتيشرت المنتخب المصري، وذلك بالتزامن مع مباراة المنتخب الوطني ضد نظيره الليبي، في الجولة الرابعة للتصفيات الافريقية المؤهلة لكاس العالم 2022 بملعب الشهداء ببني غازي.

وقالت الإعلامية بسمة وهبة: "خلونا نتفق على حقيقة ثابتة كده.. حقيقة لا يقدر زمن يغيرها، ولا تقدر أحداث تغيرها، ولا تقدر ألوان تغيرها، ولا تقدر مصالح تغيرها ، ولا تقدر أسماء تغيرها .. حقيقة ثابتة بتقول إن مصر فوق كل شيء، مصر فوق كل إعتبار، مصر فوق كل الألوان ، مصلحة مصر في كل مجال وكل شيء هي اللى فوق وأى حاجة تانية تيجى بعدها .. بقول الكلمتين دول ليه ؟!.. عشان خلاص بعد شوية دقايق من دلوقت منتخب مصر الوطنى .. هيلعب ماتش مهم في مشوار تصفيات كأس العالم أمام المنتخب الليبى الشقيق ".

وواصلت :"كان لازم الكلمتين دول يتقالوا عشان منشوفش الهمسات والأصوات الخبيثة والعقول المخطوفة ذهنيا اللى بتفكر في أنديتها قبل منتخب بلدها، واللى بيشغلها مين هيلعب ومين هيجيب الجون ولون فانلته ايه، بينما المفروض يكون شغلها الشاغل فوز مصر ومواصلة المنتخب طريقه ناحية حلم كأس العالم .. الناس دى أو القلة القليلة اللى أصابها فيروس التعصب، وغرقتها السوشيال ميديا في بحر المكايدات لازم تفهم إنه مافيش حد أهم من منتخب مصر ، ومافيش حاجة أهم من اسم مصر اللى لازم يفضل مرفوع بالفوز والأداء الرجولى والمشرف في كل المجالات حتى الكورة بغض النظر عن مين بيلعب أو مين مبيلعبش".

وتابعت :"في عصر الجمهورية الجديدة .. إتعلمنا خلاص أن الأحلام بقى ليها أرض ثابتة ممكن تقف عليها ونحقهها ، ونشوفها قدام عنينا .. فالنهاردة خطوة في طريقنا ناحية حلم الوصول لكأس العالم للمرة التانية على التوالي بعد سنوات كتير من الإشتياق .. ده اللى إتعلمناه في الجمهورية التانية إن مصر تقدر تحلم وتقدر تحقق أحلامها في كل المجالات .. وأنا واثقة في الرجالة اللى شايلين اسم مصر وعارفين كويس إن التلات نقاط بتوع النهاردة مهمين جدا لتحقيق حلم ملايين المصريين في الوصول لكأس العالم .. وخلونا نعترف مع بعض إن شكل المنتخب في الماتش اللى فات مع المدير الفني الجديد كيروش ورغم ان دى كانت المباراة الأولى كانت مختلف، كان في روح، كان في حالة مختلفة عن اللى كان بيحصل قبل كده ، وبشكل شخصى يعنى أنا مفتائلة بالراجل ده بقرراته الشجاعة حتى لو البعض اختلف عليها، وبالأداء وردود الفعل اللى شوفتها منه وهو واقف على الخط بيوجه اللعيبة في الماتش اللى فات .. ومبسوطة جدا بتصريحاته الهادية والمتزنة بخصوص التصفيات وبخصوص اللعيبة وسير المباراة .. وكمان مبسوطة بأن كل كلمة الراجل بيقولها واضح فيها مدى إدراكه لقيمة مصر ومنتخبها الوطنى ومكانتها في عالم الكرة الأفريقية".

الكلمات الدالة

مشاركه الخبر :

 
 
 
 
 
 
 
 
 

 
 
 

 
 
 

مشاركة