لسان حصاوى
لسان حصاوى


فرفش كده | لسان حصاوى

الأخبار

الخميس، 21 أكتوبر 2021 - 05:16 م

 

هدير سمير شوشة

أمى رحمة الله عليها كانت دايما تقولى أمسك لسانى قدام الناس شوية، لكن على عكسها أنا واحدة اجتماعية وسريعة التوغل والانتشار بشرط يكون فى نطاق حريمى، آه والنعمة..

فأنا هشهدكم وتقولوا إذا كنت متسرعة ومندفعة فى الكلام ولا العيب فين، ولو إن أنا عارفة إن العيب فيهم يا فى مقالبهم، أما لسانى يا روحى عليه..

يا روحى عليه


فى تانية ابتدائى، جه عامل يركب لنا بابًا، ولسبب غير مفهوم ماكنتش طايقه الراجل.. تقولى ليه؟ أقولك قلة أدب عيال وخلاص، المهم يا مؤمن فضلت رايحة جاية عليه وعمى واقف معاه قال يعنى مقاول أنفار أنا، لحد ما مرة بصيت لقيته مش موجود قلت ألف بركة.


رحت لعمى وهو واقف على الباب قلتله اومال الراجل اللى كان هنا راح فين؟

وعلشان إحنا عيلة بتاعة مقالب وهيهيهى وكركو بتاعت منى زكى دي؛ عمى قالى ده مشى. أستنى أنا أبلع ريقي؟ أبدا، احتفظ بلسانى جوه بوقى زى ما خلقه ربنا؟

لا يمكن، قلتله يلا أحسن إنه غار فى داهية، دا راجل رخم، ما أنا لازم أدلو بدلوى يعنى، ما اعرفش إن الدلو هينزل ع دماغى كمان شوية، يادوب مديت رجلى ودخلت جوه..

أضرب بعينى فوق ألاقى الراجل متشعلق فوق عند بكرة الباب وبيبصلى وهو مكشر عن أنيابه وبيحاول يبتسم كده اللى هو محسوبك هنا يا ست هانم.. يلزم أيتوها خدمة؟

وخدت ديلى فى سنانى وطرت.


أما فى رابعة ابتدائى بقى كنت باخد درس إنجليزى عند مدرس محترم جدا من البلد واتكى على محترم علشان تشفعلى لو شاف الكلام ده، جت الست والدته خبطت وجايباله الشاى فأحد التلاميذ نبهه وقاله ستى هنية، وده اسم من بختى بتشترك فيه معاها بنت معانا متعودين على ألش الأطفال الساذج ده ونقول هنية المتهنية والحمد لله إنها كانت المتهنية مش حاجة تانية، المهم لسانى اللى يتشك لازم يقول حاجة، اومال لا الناس تاكل وشنا، الحقى يا بت خدى السوكسيه..

رحت طالعة زى الصاروخ قايله هنية المتهنية ترارارا..

أبص فى وش المستر ألاقيه نزل عليه سهم الله، اللى هو شطارتك تشفعلك يا هدير بس دى أماااااااااااى، وعمديت راسى من ورا الباب عينى يادوب لمحت الست وجالى تربلة وتقمصت دور كريم عبدالعزيز وهو بيقول طبعا لو حلفتلك إنى مكنتش أعرف إن المقصودة والدة سعادتك مش هتصدقنى، مش هقولكم إن ساعتها ساد الصمت إلا من صوت صرصور الحقل، لأن صرصور الحقل بذات نفسه كان بيقول عليا وقتها سيبونى عليها والنبى لاضربها على بوقها الولية دى.
 

الكلمات الدالة

مشاركه الخبر :

 
 
 
 
 
 
 
 
 

 
 
 

 
 
 

مشاركة